Njëri nga bunkerët e forcave serbe ishte fshehur këtu.
Edhe të tjerët, ishin ndërtuar në 1 mijë e 100 metra lartësi mbidetare.
E gjitha kjo, në këtë vend të fshatit Debelldeh në Komunën e Vitisë.
Por, pse forcat serbe u stacionuan në këtë vend dhe çfarë fshihnin në këto baza?
“Ky bunker iu ka shërbyer forcave okupuese serbe, këtu e kanë pasur artilerinë e rëndë, tanke, kundër-ajror, me gjasë kundër NATO-s”, shprehet ish-ushtari i UÇK-së, Sabedini.
Ish-ushtari i UÇK-së në Koshare, Sabedini, tregon se çfarë kishte nën vëzhgim ushtria serbe nga ky vend.
“Gati prej Prishtinës e deri këtu shihet, komplet rrafshi prej Prishtinës e në drejtim tonin shihet, e përfshin Lipjanin, Ferizajn, Gjilanin, Vitinë etj, gati gjysmën e Kosovës”, thotë ai.
E së fundmi, të gjithë bunkerët e ushtrisë serbe në këtë vend u shkatërruan.
Madje mbi njërin prej tyre, do të vendosen shkronjat “U-Ç-K”
E gjitha kjo pjesë e një parku modern, me iniciativën e Organizatës së Veteranëve të Lufës, Dega në Lipjan.
“Ka mu vendos, germa më e vlefshme “U” e ushtrisë, këtu ka qenë “Bunkeri 1”, pastaj dy, tre, katër, shtatë bunkera kanë qenë me rend. Kam insistuar këtu, mbi bunker, as me metër mos më lëviz, por me qenë U-ja mbi bunkerin ku kanë qenë tanket serbe”, shprehet Demir Hasani, kryetar i OVL – UÇK-së në Viti.
E banorët e këtij fshati thonë se Debelldehu ishte caku i parë i forcave serbe me të filluar bombardimet e NATO-s.
“Rëndësia e këtij fshati është e veçantë, sepse është pastruar i pari kur kanë hyrë forcat serbe pas bombardimit të NATO-s ku i kanë pasur edhe bunkerët. Këto tri shkronja që po vendosen këtu, po vendosen me qëllim për mi kallëzua botës që mërgimtarët prej anembanë botës erdhën në Koshare e Pashtrik”, ka thënë Salih Avdullahu – mërgimtar nga Zvicra.
Ndryshe, fshati Debelldeh i komunës së Vitisë, ndodhet në kufi me Maqedoninë e Veriut.
