Zëvendëspresidenti i SHBA-së JD Vance përjashtoi të enjten aneksimin e Bregut Perëndimor nga Izraeli, duke e quajtur një votim në Knesset për aneksimin e territorit të pushtuar “një marifet politik idiot”.
“Nëse ishte një marifet politik, ishte një marifet politik shumë idiot, dhe personalisht e marr si fyerje. Bregu Perëndimor nuk do të aneksohet nga Izraeli”, u tha Vance gazetarëve në Tel Aviv, citon Al Jazeera.
“Politika e administratës Trump është që Bregu Perëndimor të mos aneksohet nga Izraeli. Kjo do të vazhdojë të jetë politika jonë”, shtoi ai.
Edhe Presidenti amerikan, Donald Trump në një intervistë me revistën Time, përsëriti atë që tha zëvendëspresidenti JD Vance pak kohë më parë, se politika e prerë e SHBA-së është kundër aneksimit izraelit.
“Nuk do të ndodhë. Nuk do të ndodhë. Nuk do të ndodhë sepse u dhashë fjalën vendeve arabe. Dhe nuk mund ta bëni këtë tani”, tha Trump për Time.
“Kemi pasur mbështetje të madhe arabe. Kjo nuk do të ndodhë sepse u dhashë fjalën vendeve arabe. Nuk do të ndodhë. Izraeli do të humbiste të gjithë mbështetjen e Shteteve të Bashkuara nëse kjo do të ndodhte”.
Dje, parlamenti izraelit miratoi një projektligj që zyrtarisht bënte thirrje për aneksimin e Bregut Perëndimor të pushtuar.
