Një flamur amerikan u ngrit të enjten jashtë rezidencës së ambasadorit amerikan në Damask, e cila kishte mbetur e mbyllur për më shumë se një dekadë.
Ky gjest simbolik shënoi një hap të rëndësishëm drejt normalizimit të marrëdhënieve midis Uashingtonit dhe qeverisë së re në Siri.
Ambasadori i ShBA-së në Turqi, Tom Barrack — tashmë edhe i dërguar i posaçëm për Sirinë — mbërriti në kryeqytetin sirian për të inauguruar zyrtarisht rezidencën diplomatike, raportoi agjencia shtetërore siriane e lajmeve SANA.
Gjatë vizitës, Barrack u takua me Presidentin e ri sirian, Ahmad al-Sharaa dhe mori pjesë në ceremoninë e nënshkrimit të një marrëveshjeje shumëpalëshe për një projekt madhor energjitik në Siri, ka raportuar AP.
Konsorciumi përfshin kompani nga Katari, Turqia dhe ShBA-të, të cilat do të ndërtojnë katër turbina me gaz me cikël të kombinuar me kapacitet prej rreth 4,000 megavat dhe një central diellor me fuqi 1,000 megavat, për të rigjallëruar rrjetin elektrik të vendit të shkatërruar nga lufta.
Ambasada amerikane në Damask ishte mbyllur në vitin 2012, pasi protestat kundër regjimit të Bashar al-Assad u shndërruan në luftë civile të përgjakshme. Assad u rrëzua nga pushteti dhjetorin e kaluar pas një ofensive të papritur nga forcat rebele.
Megjithatë, ngritja e flamurit dhe vizita e diplomatit të lartë amerikan u interpretuan si një sinjal i qartë i afrimit të Uashingtonit me qeverinë e re siriane.
Presidenti Donald Trump pati një takim të papritur me al-Sharaa në Riad më herët këtë muaj. Që atëherë, administrata amerikane ka nisur heqjen graduale të sanksioneve ekonomike ndaj Sirisë, të vendosura ndër vite gjatë sundimit të dinastisë Assad.
Departamenti Amerikan i Shtetit publikoi një deklaratë të enjten në rrjetin X, duke konfirmuar emërimin zyrtar të Tom Barrack si i dërguari special për Sirinë. “Tom e kupton potencialin e madh për bashkëpunim me Sirinë në luftën kundër radikalizmit dhe për arritjen e paqes në rajon. Së bashku, do ta bëjmë Amerikën dhe botën PËRSËRI TË SIGURTA!”, thuhej në deklaratë.
