Katër policë të Njësisë Speciale ditë më parë u suspenduan nga Policia e Kosovës, pasi që të njëjtit u raportua se kishin bërë shkaka në një grup të mbyllur në Viber me kryetarin e Kuvendit të Kosovës, Dimal Basha.
Por, tashmë që të katërtit i janë rikthyer punës në polici.
Kështu ka njoftuar avokatja Arbenita Aliu, duke thënë se në rastin e Sami Hotit dhe tre policëve të tjerë nuk ka pasur shkelje disiplinore.
“Ky vendim dëshmon një qasje të matur dhe të drejtë, duke e trajtuar këtë rast me vlerësim profesional dhe kredibilitet institucional”, ka njoftuar ajo në një postim në Facebook.
Tutje, avokatja ka shkruar se vendimi për rikthimin e tij në detyrë është një dëshmi se drejtësia dhe përgjegjësia institucionale janë vlera që Policia e Kosovës di t’i ruajë dhe respektojë.
“Sami Hoti e ka dëshmuar dinjitetin e tij jo vetëm gjatë luftës, por edhe më pas, nën uniformën policore në aksione të shumta ku ka shërbyer me përkushtim për vendin. Edhe gjatë kësaj periudhe të suspendimit, ai ka treguar qetësi dhe integritet, duke e konfirmuar edhe një herë karakterin e tij të palëkundur si polic dhe si qytetar, andaj si përfaqësuese e tij kam thirrë për reflektim bazuar në dispozitat konkrete të Aktit administrativ si dhe Ligjit për policinë”.
