Deputeti i Vetëvendosjes, Visar Korenica nuk e ka përjashtuar mundësinë që të jetë sërish pjesë e listës së kësaj partie, për ta marrë besimin e qytetarëve edhe për një mandat tjetër brenda Kuvendit të Kosovës.
Por, Korenica i cili vitin e kaluar për shkak të Kodit Civil u përjashtua nga pozita e koordinatorit të Qendrës së VV-së në Rahovecë, tha në “InfoNata” se edhe kontributi i tij në partinë e Kurtit, nuk ishte i lidhur direkt me qëllimin për të qenë pjesë e listës për deputet.
“Konsideroj se do të jetë edhe një reflektim që të mos bëhen hapa të nxitshme dhe të gabuara. Për mua nuk ka ndikuar për keq. Nuk është e thënë dhe e domosdshme që të jem pjesë e listës për deputet, sepse edhe angazhimi fillestar për të dhënë kontribut në VV, nuk është lidhur me angazhimin e domosdoshëm për të qenë në listë.”, deklaroi Korenica në Tëvë1.
Ai tha se kandidimi i tij për një mandat tjetër në legjislaturë do të varët nga rrethanat e krijuara.
“Kjo do të vlerësohet nga ana ime personale, dhe nevojës për të qenë edhe në vazhdimësi pjesë përbërëse në Kuvend. Me angazhimin që është bërë brenda, një numër i madh i ligjeve kanë shkuar tutje, duke qenë kështu pjesë e Komisioneve. Janë, këto përgjegjësi që vit pas viti, deputeti kalitet me to, dhe e përmirëson edhe më shumë angazhimin e vet. Ndoshta, dikujt duhet t’i jepim hapësirë më shumë për të dhënë kontributë më shumë, nëse shohim që kontributi nuk ka qenë i mjaftueshëm.”, tha tutje Korenica në Tëvë1.
