Ministria e Punëve të Jashtme dhe Diasporës (MPJD) ka konfirmuar vdekjen e shtetasit të Kosovës, Selim Voca, i cili ka humbur jetën në një aksident me tren në qytetin Aleksinac të Serbisë. .
Sipas njoftimit zyrtar, Voca ishte raportuar si person i zhdukur më 19 nëntor 2025 nga bashkëshortja e tij në stacionin policor në Mitrovicën e Jugut.
Autoritetet serbe kanë bërë të ditur se trupi i pajetë ndodhet aktualisht në Spitalin e Nishit.
Në njoftim është bërë e ditur se institucionet e Kosovës, në bashkërendim me MPJD-në, po punojnë për kthimin sa më të shpejtë të trupit në Kosovë.
“Ndërkohë, Zyra Ndërlidhëse e Republikës së Kosovës në Serbi është në kontakt të vazhdueshëm me familjen dhe autoritetet serbe për t’u siguruar që gjitha procedurat e nevojshme të zhvillohen pa vonesa”.
MPJD ka theksuar se rasti po trajtohet me prioritet, duke u zotuar se të gjitha hapat institucionalë do të ndërmerren për të mbështetur familjarët dhe për të sqaruar rrethanat e ngjarjes. /teve1.info/
