Një grua ka raportuar në Polici se i është vjedhur çanta me dokumente personale dhe 580 euro të gatshme, nga vetura me të cilën ishte ndalur në Korroticë të Drenasit për shkak të një defekti gjatë vozitjes.
Policia e Kosovës në raportin 24-orësh ka bërë të ditur se rasti ka ndodhur të hënën rreth orës 15:10, në rrugën Fushë-Kosovë – Prizren.
Sipas PK-së, për rastin është njoftuar edhe prokurori.
“Korroticë, Gllogoc 06.03.2023 – 15:10. Ankuesja femër kosovare ka raportuar se, derisa ishte me bashkëshortin duke lëvizur me veturë (Fushë Kosovë-Prizren) për shkak të një defekti në veturë janë ndalur dhe gjatë angazhimit për rregullimin e veturës, persona të panjohur kanë arritur që nga vetura t’i vjedhin çantën në të cilën kishte dokumentet personale dhe pesëqind e tetëdhjetë (580) € para të gatshme dhe janë larguar në drejtim të panjohur”, thuhet në raport të Policisë. /Teve1.info/
