Një qytetar nga komuna e Zubin-Potokut ka rënë viktimë e një skeme mashtruese, pasi ka dërguar 1,000 euro përmes “Western Union” në Bosnje dhe Hercegovinë, tek një person që ishte prezantuar rrejshëm si zëvendësdrejtori i Policisë për veriun, nënkolonel Veton Elshani.
Sipas raportit të Policisë së Kosovës, i dyshuari kishte kontaktuar qytetarin dhe ishte paraqitur si zyrtar i lartë policor, duke kërkuar ndihmë financiare. Pasi ka marrë shumën, mashtruesi ka ndërprerë çdo komunikim me viktimën.
“Pas pranimit të informacionit, rasti është trajtuar menjëherë dhe është iniciuar si ‘Mashtrim’, me autorizimin e Prokurorit të Shtetit,” thuhet në njoftimin zyrtar të Policisë.
Ky nuk është rasti i parë i këtij lloji. Policia e Kosovës ka konfirmuar se persona të dyshimtë kanë përdorur më parë emrin e zëvendësdrejtorit Elshani për të kërkuar para nga qytetarët në emër të ndihmës ose intervenimeve të rreme.
“Raste të ngjashme janë raportuar edhe në qytete të tjera të Kosovës. I dyshuari prezantohet si zyrtar policor dhe kërkon mjete financiare. Kjo është një praktikë mashtruese, të cilën jemi duke e hetuar intensivisht,” bëhet e ditur nga zyrtarë të hetimeve.
Policia ka lëshuar një apel të qartë për qytetarët, duke kërkuar vigjilencë dhe bashkëpunim në raportimin e rasteve të dyshimta.
“Mos u besoni personave të panjohur që prezantohen si zyrtarë policorë dhe kërkojnë mjete financiare.
Siguria juaj është prioriteti ynë, dhe ju inkurajojmë të raportoni menjëherë çdo tentim mashtrimi,” thuhet në apelin e Policisë së Kosovës.
