Edukatorja dhe kuzhinierja që akuzoheshin se kanë rrahur e keqtrajtuar një fëmijë 3-vjeçar në çerdhen “Gëzimi ynë” në Fushë-Kosovë janë liruar nga masa e paraburgimit.
Kështu ka bërë të ditur për teve1.info, avokati i njërës nga të akuzuarat, Taulant Ismajli.
Ismajli bëri të ditur se të akuzuarat janë deklaruar të pafajshme.
“Pas ngritjes së aktakuzës është mbajtur seanca e parë fillestare në të cilën seancë të pandehurat janë deklaruar të pafajshme. Brenda afatit 30 ditë mbrojtja do të ushtrojë kërkesë për kundërshtimin e provave dhe hudhjen e aktakuzës. Mbrojtja në këtë seancë ka propozuar ndërprerjen e masës së paraburgimit për shkak se kanë pushuar të gjitha shkaqet dhe rrethanat për të cilat është caktuar e njëjta, propozim ky të cilin gjykata jashtë seancës vendosi me ç’rast i liroi nga masa e paraburgimit të pandehurat”, theksoi ai.
Gjithashtu, avokati tha se do të ushtrojë kërkesë për kundërshtimin e provave dhe hudhjen e aktakuzës.
Edukatorja dhe kuzhinierja dyshoheshin për veprat penale “Keqtrajtim gjatë ushtrimit të detyrës zyrtare” dhe “Lëndim i lehtë trupor”.
Të dy të akuzuarat ishin arrestuar pas denoncimit të nënës së 3-vjeçarit, e cila edhe kishte publikuar pamjet nga kamerat brenda çerdhes ku shiheshin edukatoret duke e keqtrajtuar viktimën./teve1.info/
