Një operacion i gjerë i udhëhequr nga Prokuroria Speciale e Republikës së Kosovës, në bashkëpunim me Policinë e Kosovës dhe Agjencinë e Kosovës për Inteligjencë (AKI), është zhvilluar të enjten pasdite në rajonin e Prishtinës, në kuadër të hetimeve për korrupsion dhe keqpërdorim të detyrës zyrtare.
Sipas Prokurorisë Speciale, aksioni lidhet me dyshime serioze për përfshirje në disa vepra penale, përfshirë korrupsionin, keqpërdorimin e pozitës zyrtare, marrjen dhe dhënien e ryshfetit, ushtrimin e ndikimit, mashtrimin, si dhe armëmbajtjen pa leje.
“Operacioni është rezultat i një periudhe të gjatë hetimesh dhe monitorimi, gjatë së cilës janë zbatuar edhe masa të veçanta hetimore, nën udhëheqjen e Prokurorit Special”, thuhet në njoftimin e Prokurorisë Speciale.
Gjatë operacionit janë arrestuar shtatë persona, me inicialet F.I., J.M., N.K., M.D., B.D., Sh.T. dhe G.L. Aksioni është realizuar nga Drejtoria për Hetimin e Krimeve Ekonomike në kuadër të Policisë së Kosovës.
Prokuroria ka bërë të ditur se ndaj të arrestuarve do të ndërmerren veprimet e mëtejme procedurale, ndërsa hetimet janë duke vazhduar.
Tutje poashtu është bërë e ditur se gjatë operacionit, Policia e Kosovës me njësitet e DHKEK, pas hetimeve të autorizuara nga PSRK, ka kapur në flagrancë tre të dyshuar duke shkëmbyer para në vlerë prej 9,900 €, si pjesë e marrëveshjes për ndarje të ryshfetit.
Në koordinim me prokurorinë, njësitet policore kanë kryer kontrolle në pesë lokacione, ku janë sekuestruar, para të gatshme, tri automjete, gjashtë telefona mobil, një laptop dhe, në një nga lokacionet, armë dhe municion.
“Policia e Kosovës, respektivisht DHKEK, pas hetimeve të zhvilluara me autorizim të PSRK-së, ka kapur në flagrancë tre të dyshuar duke shkëmbyer para në vlerë të 9900€ si pjesë e marrëveshjes në mes tyre për ndarje të ryshfetit. Në koordinim me prokurorinë, njësitet policore kanë vazhduar me kontroll në pesë lokacione, ku gjatë kontrollit janë sekuestruar dëshmitë si në vijim; para të gatshme, tri vetura, gjashtë telefona mobil, një llaptop, etj,. si dhe në një nga lokacionet janë gjetur armë dhe municion. Lidhur me rastin janë arrestuar shtatë të dyshuar ( gjashtë meshkuj dhe një femër kosovare ) dhe të njëjtit pas intervistimit me vendim të prokurorit janë dërguar në mbajtje”, thuhet në raportin e policisë.
