Tyson Fury do të kthehet sërish, vitin e ardhshëm

36-vjeçari Fury u pensionua nga boksi në janar, pasi humbi rimeçin për titull të botës me Oleksandr Usykun një muaj më herët.

“’Gypsy King’ do të kthehet”, shkroi Alalshikh në X.

“Kam folur me të dhe e kam premtimin e tij që ta kem në Riad në vitin 2026. Kemi një lepur për të zënë”.

Britaniku Fury shpesh e quajti ukrainasin Usyk “lepur”, në përgatitjet për dy meçet e tyre për titull. Të dy meçet ishin zhvilluar në kryeqytetin e Arabisë Saudite, Riad, raportoi BBC.

Usyku e mposhti Furyn në maj të vitit 2024 me vendim të ndarë të gjyqtarëve, për t’u bërë kampioni i parë i padiskutueshëm, me katër breza, në kategorinë e rëndë.

Në një postim në “Instagram”, Fury shkroi: “Le të shohim se çka do të sjellë viti 2026”. Ai e shkroi këtë mbi një foto të tij duke shtrënguar duart me Alalshikh, i cili është kryetar i autoritetit të përgjithshëm të argëtimit në Arabinë Saudite.

Alalshikh ka qenë figurë vendimtare në ngritjen e boksit në Arabinë Saudite. Bëri të mundur që në Arabi të zhvillohen disa meçe të profilit më të lartë.

Të mërkurën Fury la të kuptohet se do të dëshironte një meç në Britani të Madhe.

“Me kë do të preferoja të luftoja tani? Usyk. Sepse dua hakmarrjen time në Angli”, u tha ai gazetarëve në një aktivitet të Asociacionit Ndërkombëtar të Boksit në Stamboll.

“Nuk besoj se kam pasur shans të drejtë në dy rastet e kaluara. Kjo është e gjitha që dua. Dua një shans të drejtë pasi nuk besoj se e kisha këtë në dy meçet e kaluara. Ky është ai që dua, por nëse nuk e marr atë atëherë do të jetë me Joshuan. Do të ishte meçi më i madh britanik në histori. Do të thyheshin të gjitha rekordet dhe do të shiteshin 100 mijë bileta për ‘Wembley’ brenda një ore. Është ndeshje që mund të ndodhë, me siguri, nëse vendos të kthehem”.

Fury ende nuk është përballur me Anthony Joshuan, që u mposht nga Daniel Dubois në shtator.

Ndërkohë Usyk do të bëhet dy herë kampion i padiskutueshëm i kategorisë së rëndë, nëse e mposht Duboisin në “Wembley” më 19 korrik.