Turqit janë duke votuar sot në balotazhin presidencial që mund të shohë Tajip Erdogan të zgjasë sundimin e tij në një dekadë të tretë dhe të vazhdojë me rrugën gjithnjë e më autoritare të Turqisë, politikën e jashtme muskulare dhe qeverisjen ekonomike joortodokse.
Erdogan, 69 vjeç, sfidoi sondazhet e opinionit dhe doli përpara me pothuajse pesë pikë epërsi ndaj rivalit të tij Kemal Kilicdaroglu në raundin e parë më 14 maj. Por, ai nuk arriti 50% të nevojshëm për të shmangur balotazhin, në një garë me pasojsa të thella për vetë Turqinë dhe gjeopolitikën globale.
Votimi filloi në 8 të mëngjesit dhe do të përfundojë në orën 17:00. Rezultati pritet të fillojë të bëhet i qartë në orët e hershme të mbrëmjes me orën lokale. Qendrat e votimit thuhet se ishin më të qeta në shumë vende se dy javë më parë, kur pjesëmarrja ishte 89%.
Zgjedhjet do të vendosin jo vetëm se kush e udhëheq Turqinë, një vend anëtar i NATO-s me 85 milionë banorë, por edhe se si qeveriset ajo, ku po shkon ekonomia e saj pasi monedha e saj ra në një të dhjetën e vlerës së saj kundrejt dollarit në një dekadë, dhe forma e politikës së saj të jashtme, e cila e ka parë Turqinë të zemërojë Perëndimin duke kultivuar lidhje me Rusinë dhe shtetet e Gjirit, raporton Reuters.
Zgjedhjet fillestare treguan mbështetje më të madhe se sa pritej për nacionalizmin – një forcë e fuqishme në politikën turke e cila është ngurtësuar nga vite të tëra armiqësish me militantët kurdë, një tentativë për grusht shteti në vitin 2016 dhe fluksi i miliona refugjatëve nga Siria që nga fillimi i luftës atje në 2011.
