Turqia me potencialin e saj të madh të energjisë së rinovueshme, synon të rrisë kapacitetin e saj të instaluar të energjisë së erës me 50% me 5 miliardë dollarë investime gjatë pesë viteve të ardhshme, tha për Anadolu Presidenti i Shoqatës Turke të Energjisë së Erës (TUREB), Ibrahim Erden.
Në planin e fundit pesëvjeçar të zhvillimit të vendit, synimi i vendit ishte rritja e kapacitetit të instaluar nga 12,000 megavat aktuale në 18,000 megavat.
Duke folur në margjinat e Kongresit të 12-të Turk të Energjisë së Erës në Stamboll, Erden tha se vendi mund ta arrijë këtë objektiv duke investuar 1 miliard dollarë çdo vit deri në vitin 2028.
Megjithëse vendi planifikon të arrijë 18,000 megavat gjatë pesë viteve, Erden argumentoi se potenciali i tij i energjisë së erës është shumë më i madh, pasi vendi ka arritur vetëm rreth 10% të potencialit të tij total deri më tani, raporton AA.
“Potenciali i vlerësuar i instaluar i energjisë është midis 120,000 megavat dhe 150,000 megavat në projektet e erës në tokë,” tha ai.
Aktualisht, i renditur si sektori i pestë më i madh i erës në Evropë, Erden tha se Türkiye mund të bëhet një lojtar edhe më i madh në tregun evropian.
Ai i bëri thirrje sektorit publik dhe privat të sigurojnë që procesi i lejeve të ecë me efikasitet duke u siguruar që investitorët të përfundojnë procedurën e lejes në kohë dhe që sektori publik të lëvizë shpejt për të përshpejtuar këtë proces.
Erden tha se vendi synon gjithashtu që të ketë 5 gigavat kapacitet të erës në det të hapur deri në vitin 2035.
Projektet e erës në det të hapur, megjithatë, janë më të shtrenjta se ato në tokë pasi, sipas Erden, investimet në turbina përbëjnë vetëm 35-40% të financimit total të projektit, ndërsa ato përbëjnë 70-75% të projekteve me bazë tokësore.
Pjesa më e madhe e buxhetit për investime, vazhdoi ai, është ndarë për infrastrukturë më komplekse, ku përfshihen shpenzimet e ndërtimit, instalimit të kabllove dhe logjistikës.
Mbajtja e tenderëve të erës në det të hapur është hapi tjetër logjik, sipas Erden. Kjo procedurë ka nevojë për studime të thelluara duke marrë parasysh vendndodhjet ku fuqia maksimale e erës është e mundur si dhe pozicioni optimal për lidhjet me tokën.
Fillimisht parashikojmë investime në projekte offshore nga Gjiri”, tha ai.
