Juventusi është futur fuqishëm në afatin kalimtar veror me synimin për të përforcuar skuadrën, veçanërisht në repartin e mesfushës.
Drejtuesit bardhezi po kërkojnë profile që i përshtaten vizionit të trajnerit të ri, Igor Tudor.
Trajneri kroat gëzon besimin e plotë të klubit dhe ka marrë mbështetje për të ndërtuar një ekip konkurrues, që do të rikthejë Juventusin në nivelet më të larta të futbollit italian dhe evropian.
Një nga prioritetet kryesore është përforcimi në mesfushë, ku klubi po punon mbi një listë me disa emra potencialë për këtë afat kalimtar veror.
Sipas asaj që raporton ‘La Gazzetta dello Sport’, një nga opsionet e konsideruara nga Juventusi është Yves Bissouma, mesfushori 28-vjeçar i Tottenham Hotspur.
Bissouma është nën kontratë me klubin londinez deri në verën e vitit 2026, por nuk përjashtohet një largim nëse paraqitet oferta e duhur. Ai shihet si një element që mund t’i sjellë balancë dhe qëndrueshmëri mesfushës bardhezi.
Aktualisht, Juventusi ka shfaqur interes, por nuk ka bërë ende një hap konkret për transferimin e tij. Kandidatura e tij është në fazën e vëzhgimit dhe varet nga zhvillimet në javët e ardhshme.
Tottenhami nuk është i prirur ta largojë lehtësisht lojtarin, por gjithçka mund të ndryshojë nëse Juventus paraqet një ofertë bindëse prej rreth 30 milionë eurove.
