Para qytetarëve të Kaçanikut dhe Hanit të Elezit, kandidati i LDK-së për kryeministër Lumir Abdixhiku premtoi central me gaz amerikan, që do të vijë nga Shkupi dhe Hani i Elezit dhe Kaçaniku do të jenë përfituesit e parë.
Abdixhiku nga Kaçaniku tha se ky është zotim për investimet më të mëdha kapitale në vend.
Ai përmendi edhe premtimet e tjera.
“Me ministrinë e familjes do të bëjmë politika për qytetarët. Do të ndahen 200 euro në muaj për secilin të posalindur për 12 muaj. Pensionet do të dyfishohen nuk do të ketë më pak se 300 euro në mandatin tonë qeverisës. Do heqim TVSH-në për të gjitha produktet bazike, duke ulur çmimin për bukë, vaj, sheqer, të gjitha produktet bazike të shportës së konsumatorit. Për katër vitet e ardhshme, nën qeverisjen e LDK-së, çmimet e rrymës nuk do të rriten për asnjë cent. Do të rrisim pagat për sektorin publik, nuk do të ketë pagë pa koeficient 150, paga e mësuesit do të jetë 1000 euro në muaj. Polici, zjarrfikësit, mjekët nga 900 euro në muaj. Do të bëjmë investimet më të mëdha që ka pasur Kosova. Hani i Elezit dhe Kaçaniku do të jenë përfituesit e parë. Gaz amerikan, nga Shkupi në Elez Han, deri në Ferizaj: ky central me gaz do nisë nga Shkupi. Do të ndërtojmë spitalin e ri, QKUK-në e re, nga 40 minuta larg distancë qyteteve. Kemi paraparë mësimin tërëditor edhe në han të Elezit dhe Kaçanik”, tha Abdixhiku.
Ndërsa, kandidatja e LDK-së për presidente, Vjosa Osmani tha se Kosova meriton me shumë se një retorikë përçarëse dhe të dhunshme që po i servohet qytetarëve.
“Edhe Kaçaniku sikurse gjithë Kosova meriton shumë më shumë sesa retorikën përçarëse dhe të dhunshme, e cila është gjëja e vetme që po i servohet qytetarëve tanë nga të tjerët. Meritojnë një jetë të dinjitetshme, ku qytetari nuk duhet çdo ditë ta ketë mendjen tek papërballushmëria e çmimeve të ushqimit, rrymës dhe shërbimeve të tjera. Meritoni një shtet ku të ardhmen nuk e shihni jashtë Kosovës, por ne e duam ta ndërtojmë të ardhmen këtu. E ndiej fuqishëm vullnetin tuaj për të mbrojtur dhe përparuar Republikën tonë. Brenda LDK-së po forcohet besimi për ditën vendimtare, ku do dëshmojmë se sa herë rrezikohen themelet e shtetit tonë, ky popull di të bëjë dallimin”, tha Osmani.
Pas Kaçanikut, LDK-ja do të mbajë tubime edhe në Shtime dhe Fushë Kosovë.
