Tubim paqësor e solidarizues pritet të mbahet në Hagë më 15 dhe 16 shtator, në mbështetje të ish-krerëve të Ushtrisë Çlirimtare të Kosovës, në prag dhe në ditën e shpalljes së aktgjykimit në rastin ndaj tyre.
Organizimin e ka paralajmëruar Platforma “Liria ka Emër”, e cila synon që përmes këtij tubimi të bashkojë shqiptarë nga Kosova dhe mërgata.
Nga kjo platformë thonë se tubimi do të jetë paqësor dhe dinjitoz, ndërsa kanë bërë thirrje që diaspora t’i bashkohet organizimit në mënyrë të koordinuar.
Ismail Tasholli ka bërë të ditur se kërkesa për organizimin e tubimit do t’u dorëzohet autoriteteve kompetente në Hagë.
Sipas planifikimit, grumbullimi do të nisë më 15 shtator në orën 22:00 dhe do të vazhdojë deri më 16 shtator në orën 10:00.
“Me këtë rast u bëjmë thirrje të gjithë vëllezërve dhe motrave tona në diasporë, që aty ku kanë mundësi të nisen një ditë më herët dhe t’i bashkohen në mënyrë të organizuar tubimit në lokacionin që do të caktohet nga autoritetet e Hagës. Dëshirojmë ta theksojmë qartë, ky do të jetë një tubim paqësor, dinjitoz dhe i organizuar në respekt të plotë të ligjeve dhe autoriteteve të vendit pritës”, tha Ismail Tasholli
Tasholli tha se organizatorët do t’i respektojnë udhëzimet e autoriteteve dhe Policisë së Hagës.
Ndërkaq, Platforma “Liria ka Emër” po kërkon edhe përfshirjen e komunave në aktivitetet që lidhen me aktgjykimin ndaj ish-krerëve të UÇK-së.
Eliza Hoxha tha se disa komuna tashmë i janë bashkuar nismës për vendosjen e orëve të numërimit mbrapsht deri në shpalljen e aktgjykimit.
Prishtina, Skenderaj, Vitia, Vushtrria dhe Prizreni janë komunat e përmendura nga Hoxha.
Ajo u ka bërë thirrje edhe komunave të tjera që t’i bashkohen kësaj nisme.
Platforma u ka bërë kërkesë edhe drejtorive komunale të arsimit që java e parë e shtatorit t’u kushtohet aktiviteteve edukative për historinë, sakrificën dhe rolin e UÇK-së.
“U bëjmë thirrje edhe komunave të tjera të Kosovës që t’i bashkohen kësaj nisme, duke vendosur ekranet për numërimin mbrapa dhe duke stolisur hapësirat publike të qyteteve me flamuj dhe simbolet e Ushtrisë Çlirimtare të Kosovës. Njëkohësisht, u jemi drejtuar komunave të Kosovës dhe drejtorive komunale të arsimit me kërkesën që java e parë e shtatorit t’i kushtohet UÇK-së në shkollat e Kosovës”, u shpreh Hoxha.
“Liria ka Emër” ka paralajmëruar se aktivitetet do të vazhdojnë edhe në ditët në vijim në Kosovë dhe diasporë.
