Presidenti amerikan Donald Trump propozoi të shtunën zhvendosjen e palestinezëve nga Gaza në vendet fqinje si Egjipti dhe Jordania – një propozim i pazakontë që u kundërshtua nga ish-administrata e Joe Biden.
Duke folur me gazetarët në bordin e Air Force One drejt Majamit, presidenti tha se e ngriti çështjen gjatë një bisede telefonike me Mbretin Abdullah II të Jordanisë dhe ai mund të bisedojë me presidentin egjiptian Abdel-Fattah al-Sisi të dielën.
“I thashë atij (mbretit të Jordanisë) se do të doja që ju të merrnit më shumë, sepse po shikoj të gjithë Rripin e Gazës tani dhe është një rrëmujë, është një rrëmujë e vërtetë”, tha Trump. “Do të doja që ai (mbreti i Jordanisë) të merrte njerëzit”.
“Unë do të doja që Egjipti të merrte njerëz. Unë do të flas me gjeneralin Al Sisi nesër dikur besoj. Do të doja që Egjipti të merrte njerëz, dhe do të doja që Jordania të merrte njerëz,” vazhdoi Trump.
“Jemi duke folur për një milion e gjysmë njerëz, dhe ne thjesht e pastrojmë të tërën. Ju e dini që gjatë shekujve aty ka pasur shumë, shumë konflikte. Dhe nuk e di, diçka duhet të ndodhë,” shtoi ai.
Duke e përshkruar Gazën si “një vend rrënimi”, presidenti i SHBA tha: “Pothuajse gjithçka është shkatërruar dhe njerëzit po vdesin atje. Kështu që më mirë do të përfshihem me disa nga kombet arabe dhe të ndërtoj banesa në një vend tjetër ku ata mund të jetojnë në paqe për një ndryshim”.
Ai shtoi se lëvizja “mund të jetë e përkohshme ose mund të jetë afatgjatë”, raporton agjencia Anadoly.
Administrata Biden kundërshtoi zhvendosjen e banorëve të Gazës jashtë enklavës, duke mbrojtur një kthim të banorëve të Gazës në shtëpitë e tyre pas një paqeje të mundshme dhe një zgjidhje me dy shtete.
Që nga 19 janari, është vendosur një armëpushim për t’u sjellë pushim civilëve në enklavën palestineze, por Trump tha javën e kaluar se nuk ka besim se armëpushimi do të mbahet.
“Nuk është lufta jonë. Është lufta e tyre. Mendoj se ata janë shumë të dobësuar nga ana tjetër,” u tha Trump gazetarëve në Zyrën Ovale. “Unë pashë një foto të Gazës. Gaza është si një vend shkatërrimi masiv. Ai vend është. … Vërtet duhet të rindërtohet në një mënyrë tjetër,” tha ai.
“Gaza është interesante. Është një vend fenomenal në det, moti i mirë, e dini, gjithçka është mirë. Është sikur disa gjëra të bukura mund të bëhen me të, por është shumë interesante, por disa gjëra fantastike mund të bëhen me Gazën,” shtoi Trump.
