Presidenti amerikan Donald Trump u zotua të mërkurën se do t’i dërgojë çdo të rrituri amerikan 5,000 dollarë nëse republikanët mbajnë kontrollin e Dhomës së Përfaqësuesve dhe Senatit në zgjedhjet e mesit të mandatit.
Premtimi ka shumë të ngjarë të kushtojë më shumë se 1 trilion dollarë dhe do të kërkojë miratimin e Kongresit, si dhe do të përkeqësojë më tej deficitin buxhetor vjetor prej gati 1.8 trilion dollarësh të vendit dhe shqetësimet rreth inflacionit, shkruan Associated Press.
“Nëse fitojnë republikanët, fitoni me ne dhe merrni 5,000 dollarë”, tha Trump gjatë konventës së mesmandatit të republikanëve në Dallas. “Do të quhet Dividendi i Trumpit.”
Ai i krahasoi pagesat me shpërndarjet e një korporate për aksionarët, duke përmendur “forcën dhe suksesin tonë të jashtëzakonshëm ekonomik”.
Brenda një ore, zëvendëspresidenti JD Vance dukej se u përpoq ta tërhiqte propozimin e Trump – të paktën pjesërisht – duke sugjeruar se pagesat e dividentëve nuk do t’u shkonin të pasurve.
Vance sugjeroi se ato mund të paguheshin nga të ardhurat nga tarifat e SHBA-së, megjithëse pagesa e sugjeruar e zbeh atë që SHBA-të kanë marrë përmes masave proteksioniste.
Borxhi kombëtar i SHBA-së muajin e kaluar kaloi 40 trilion dollarë për herë të parë.
Propozimi i Trumpit do të ishte i ligjshëm sepse pagesa do t’u shkonte të gjithëve pavarësisht se si kanë votuar, ose nëse kanë votuar fare, tha avokati me bazë në Neë Mexico, John Day.
