Kryebashkiaku i qytetit amerikan të San Diegos ka dënuar ashpër islamofobinë të hënën, pasi adoleshentë të armatosur hapën zjarr në një xhami lokale, duke vrarë tre persona, në atë që autoritetet kanë thënë se po hetohet si një krim urrejtjeje.
“Urrejtja nuk ka vend në San Diego. Islamofobia nuk ka vend në San Diego. Një sulm ndaj çdo banori të San Diegos është një sulm ndaj të gjithë banorëve të San Diegos dhe ne nuk do ta durojmë këtë”, u tha Todd Gloria gazetarëve në një konferencë për shtyp disa orë pas të shtënave fatale, citon Anadolu.
“Le të mos ketë keqkuptime për këdo që do të kërkonte të sillte këtë lloj dhune në këtë qytet: do të përballeni me forcën e plotë të partneriteteve tona të zbatimit të ligjit. Kushdo që kërkon të bëjë dëm këtu do ta kuptojë se përgjigja do të jetë e shpejtë dhe do të sillet para drejtësisë”, shtoi ai.
Reagim ka pasur edhe nga vet Presidenti i SHBA-së, Donald Trump, i cili e përshkroi të hënën incidentin me të shtëna si një “situatë të tmerrshme”.
Duke folur me gazetarët pasi u informua mbi zhvillimet, Trump tha se zyrtarët federalë dhe lokalë po e vlerësonin në mënyrë aktive incidentin dhe po mblidhnin informacione shtesë.
Kurse drejtori i Qendrës Islamike të San Diegos ku ndodhi incidenti, i quajti “jashtëzakonisht të skandaloze” të shtënat me armë zjarri në xhami.
“Nuk kemi përjetuar kurrë më parë një tragjedi si kjo”, u tha gazetarëve Taha Hassane.
Duke shprehur mbështetje për komunitetin, Hassane tha se të gjitha vendet e adhurimit në qytet, përfshirë xhamitë, duhet të mbrohen gjithmonë.
Autoritetet thanë të hënën se tre viktima dhe dy të dyshuar për të shtëna u vranë në një incident me të shtëna në qendër.
