Presidenti Donald Trump nënshkroi një urdhër ekzekutiv të premten për të vendosur një tarifë aplikimi prej 100 mijë dollarësh për vizat H-1B — në përpjekje për të kufizuar atë që administrata e tij thotë se është përdorim i tepruar i programit, raporton CNN.
“Na duhen punonjës të shkëlqyer, dhe kjo garanton që kjo do të ndodhë,” tha Trump nga Zyra Ovale, ku zyrtarët shpjeguan se si masa do të inkurajonte kompanitë të punësonin punonjës amerikanë, ndërkohë që ofron një mundësi për të punësuar punonjës të huaj të aftë në fusha të specializuara.
Ky vendim do të kufizojë hyrjen nën program, përveçse nëse shoqërohet me këtë pagesë.
Në një urdhër tjetër, Trump gjithashtu kërkoi krijimin e një “kartë ari” për emigracionin që, siç tha ai, do të përshpejtonte vizat për disa emigrantë në këmbim të një tarife të lartë. Politika do të përshpejtojë vizat për të huajt që paguajnë 1 milion dollarë, ndërsa një kompani mund të paguajë 2 milion dollarë për të përshpejtuar procesin për një punonjës të huaj që ajo sponsorizon.
Viza H-1B është një vizë pune që është e vlefshme për tre vjet dhe mund të rinovohet për një tjetër periudhë prej tre vitesh. Ekonomistët kanë argumentuar se ky program u mundëson kompanive amerikane të mbajnë konkurrueshmërinë dhe të rrisin biznesin e tyre, duke krijuar më shumë vende pune në SHBA.
Sekretari i Tregtisë, Howard Lutnick, u tha gazetarëve se administrata erdhi te tarifa prej 100,000 dollarë në vit, plus kostot e verifikimit, pas bisedave me kompanitë.
Ai theksoi se struktura e pagesës është ende nën diskutim me Departamentin e Sigurisë Kombëtare, sa i përket “nëse do të ngarkohet 300,000 dollarë paraprakisht, apo 100,000 dollarë çdo vit për tre vitet”.
