Presidenti amerikan, Donald Trump ka vendosur tarifa 50% për shumicën e importeve nga India, duke realizuar një kërcënim për të ndëshkuar një nga ekonomitë më të mëdha në botë për blerjet e saj të naftës ruse me çmime të zbritura.
Tarifat, të cilat hynë në fuqi menjëherë pas mesnatës së së mërkurës në Uashington, pritet të kenë pasoja të mëdha për ekonominë indiane dhe mund të shkaktojnë çrregullime në zinxhirët globalë të furnizimit.
Më herët gjatë muajit, SHBA kishte vendosur tarifa 25% për mallrat indiane, por Trump njoftoi vendimin për të dyfishuar normën, duke përmendur si arsye kryesore blerjet e naftës ruse nga India, të cilat, sipas Shtëpisë së Bardhë, “po financojnë në mënyrë indirekte luftën e Rusisë kundër Ukrainës”.
Që nga rikthimi në Shtëpinë e Bardhë në janar, presidenti amerikan ka rritur ndjeshëm tarifat për mallrat nga shumica e vendeve të botës, duke shkaktuar tensione me aleatë dhe rivalë, si dhe duke nxitur shqetësime për një rritje të mundshme të inflacionit.
Vendimi më i fundit e vendos Indinë përballë disa prej tarifave më të larta që SHBA ka vendosur ndonjëherë për një partner tregtar.
Edhe Brazili është përballur me tarifa 50% për eksportet e tij drejt SHBA-së. Zyrtarët indianë kanë reaguar duke thënë se vendi është “veçuar padrejtësisht” për shkak të marrëdhënieve të tij tregtare me Rusinë dhe kanë paralajmëruar se kjo mund ta shtyjë Indinë të afrohet më shumë me Moskën dhe Pekinin, duke u larguar nga Uashingtoni, shkruan The Guardian.
Ndërkohë, shumica e eksporteve indiane në SHBA – që kapën vlerën 87.3 miliardë dollarë vitin e kaluar, sipas të dhënave nga përfaqësuesi amerikan i tregtisë – tani përballen me tarifa të larta.
Megjithatë, disa produkte kyçe, përfshirë telefonat inteligjentë, për momentin janë përjashtuar nga këto masa.
