Presidenti amerikan, Donald Trump ka thënë se deri më sot pasdite, ende nuk ka arritur në një vendim përfundimtar mbi përfshirjen e mundshme të SHBA-së në konfliktin midis Izraelit dhe Iranit, duke shtuar se së shpejti do të mbledhë ekipin e tij në Dhomën e Situatave me zyrtarë të lartë për të diskutuar opsionet.
“Kam ide se çfarë të bëj, por nuk kam marrë ende një vendim përfundimtar. Më pëlqen ta marr vendimin përfundimtar një sekondë para se të vijë koha, e dini, sepse gjërat ndryshojnë. Dua të them, veçanërisht me luftën, gjërat ndryshojnë me luftën. Mund të shkojë nga një ekstrem në tjetrin”, ka thënë ai për CNN.
Trump detajoi disa nga mendimet e tij, ndërsa është afruar me idenë e përdorimit të mundshëm të aseteve ushtarake amerikane për të goditur objektet bërthamore iraniane.
«Filloi natën e parë. Ajo natë e parë ishte shkatërruese dhe, siç e dini, e shkatërroi vërtet njërën palë. Një mbrëmje, ditë shkatërruese dhe pak a shumë vazhdoi kështu. Kam një takim në Dhomën e Luftës pas pak kohe, Dhomën e Situatave, siç e quajnë disa njerëz. Pra, do të takohemi, do të shohim. Jemi në mes të kësaj”, tha ai, duke iu referuar bombardimeve të Izraelit ndaj lokacioneve bërthamore dhe zyrtarëve ushtarakë në Iran, të cilat filluan javën e kaluar.
I pyetur se çfarë do të ndodhte nëse regjimi iranian bie, Trump ka thënë se ka një plan për gjithçka, por do të shoh se çfarë do të ndodhë.
“Kam ende rrugë për të bërë”, është shprehur ai duke përsëritur se Irani “duhet të kishte” bërë një marrëveshje bërthamore.
Trump sugjeroi përsëri se Irani dëshiron të takohet dhe “(dëshiron) të vijë në Shtëpinë e Bardhë”, diçka që zyrtarët iranianë e kanë kundërshtuar fuqishëm .
Presidenti shtoi më vonë se nuk e ka “mbyllur derën për takim me ta”.
