Presidenti amerikan, Donald Trump ka thënë se çdo vend që bën biznes me Iranin do të përballet me një normë tarifore prej 25% në tregtinë me SHBA-në, ndërsa Uashingtoni po shqyrton një përgjigje ndaj situatës së protestave në vendin pers.
Trump në një postim në rrjetin Truth Social ka thënë se, “duke hyrë menjëherë në fuqi, çdo vend që bën biznes me Republikën Islamike të Iranit do të paguajë një tarifë prej 25% për çdo biznes që bën me Shtetet e Bashkuara të Amerikës”.
“Ky urdhër është përfundimtar”, tha Trump pa dhënë detaje të mëtejshme. Destinacionet kryesore të eksportit për mallrat iraniane përfshijnë Kinën, Emiratet e Bashkuara Arabe dhe Indinë.
Në përgjigje të deklaratës së Trump, Kina tha se kundërshtonte “çdo sanksion të paligjshëm unilateral dhe juridiksion afatgjatë, dhe do të marrë të gjitha masat e nevojshme për të mbrojtur të drejtat dhe interesat e saj legjitime”, raporton Guardian.
Irani është vendosur nën sanksione të ashpra nga Uashingtoni për vite me radhë, duke vështirësuar skajshëm situatën ekonomike atje, që ka nxitur pakënaqësi të mëdha në popullsinë iraniane.
Vendi i cili pati një luftë 12-ditore me aleatin e SHBA-së, Izraelin, vitin e kaluar dhe objektet bërthamore të të cilit u bombarduan nga ushtria amerikane në qershor, po përjeton demonstratat më të mëdha antiqeveritare në vite.
Protestat që filluan si shprehje e pakënaqësisë për shkak të gjendjes ekonomike, shpejt u shëndërruan në thirrje politike për ndërrim të regjimit.
Autoritetet iraniane kanë pohuar se do të marrin parasysh kërkesat legjitime të qytetarëve por nuk do të tolerojnë trazira dhe dhunë, të cilat po nxiten nga, siç thanë ata, akterë të jashtëm për t’i dhënë arsyetim SHBA-së për ndërhyrje ushtarake në vend./teve1
