Presidenti amerikan, Donald Trump, të martën e ka përcaktuar Arabinë Saudite si një aleat të madh të SHBA-së jashtë NATO-së.
“Jam i kënaqur të njoftoj se po e çojmë bashkëpunimin tonë ushtarak në nivele edhe më të larta duke e caktuar zyrtarisht Arabinë Saudite si një aleat të madh jashtë NATO-s, gjë që është shumë e rëndësishme për ta”, tha Trump gjatë takimit me princin e kurorës saudite, Mohammed bin Salman në Shtëpinë e Bardhë.
Kjo, megjithëse një lëvizje simbolike, i ofron partnerëve të jashtëm benefite në sferën e mbrojtjes, sigurisë dhe tregtisë, si dhe një privilegj në qasje në armët, trajnimet dhe kreditë amerikane.
Aleatë të tjerë të mëdhenj jo-anëtarë të NATO-s përfshijnë Bahreinin, Kolumbinë, Egjiptin, Izraelin, Japoninë, Kenian, Pakistanin, Katarin, Korenë e Jugut dhe Tunizinë.
Në darkën e princit me presidentin Trump, u formalizua poashtu vendimi për t’i shitur Mbretërisë Arabe aeroplanë ushtarakë F-35, ka raportuar Associated Press.
Zyrtarët izraelitë kanë sugjeruar se nuk do të ishin kundër blerjes së avionëve F-35 nga Arabia Saudite, për sa kohë që Arabia Saudite normalizon marrëdhëniet me Izraelin sipas kuadrit të Marrëveshjeve të Abrahamit.
Sauditët kanë thënë se do t’i bashkohen Marrëveshjeve të Abrahamit, por vetëm pasi të ketë një rrugë të besueshme dhe të garantuar drejt shtetësisë palestineze, një qëndrim që Princi Mohammad e përsëriti në takim.
Trump tha gjithashtu se SHBA-të dhe Arabia Saudite do të përfundonin një marrëveshje më të gjerë mbi çështjet ushtarake dhe të sigurisë gjatë vizitës dhe se SHBA-të do të vazhdonin me një marrëveshje bërthamore civile me Arabinë Saudite.
Të dy vendet nënshkruan gjithashtu një marrëveshje që u kërkon sauditëve të blejnë gati 300 tanke nga SHBA-ja.
