Presidenti amerikan Donald Trump ka deklaruar se marrëveshja e paqes me Iranin pritet të nënshkruhet shumë shpejt, duke e cilësuar atë si një marrëveshje “historike”.
Duke folur në konferencën për shtyp gjatë samitit të G7-ës, Trump tha se e kishte diskutuar Memorandumin e Mirëkuptimit me Iranin me një numër aleatësh ndërkombëtarë, përfshirë vendet anëtare të G7-ës.
“Nesër, ndoshta të nesërmen”, tha ai kur u pyet se kur pritet të formalizohet marrëveshja. Më herët, Trump kishte deklaruar se dokumenti do të nënshkruhej zyrtarisht të premten në Zvicër.
Presidenti amerikan theksoi se Shtetet e Bashkuara nuk do të kontribuojnë financiarisht në procesin e rindërtimit të Iranit pas dëmeve të shkaktuara nga lufta.
“Dhe nuk do të jetë nga ne. Nuk kemi pse t’u japim asgjë. Por disa njerëz mund të duan të investojnë”, u tha Trump gazetarëve, citon Al Jazeera.
Deklaratat e tij vijnë në një kohë kur administrata amerikane po përballet me presion politik të brendshëm lidhur me raportet se marrëveshja mund të çojë në lirimin e aseteve të ngrira iraniane.
“Ata kanë nevojë për investime”, tha Trump, duke pretenduar se lufta shkaktoi “ndoshta dy trilionë dollarë” në dëme. “Pra, dikush do të duhet t’i ndihmojë. Nuk ka asnjë garanci për t’i ndihmuar. Mund të jenë fqinjët e tyre që do t’i ndihmojnë pak, nuk e di.”
Ai shtoi: “Por ne nuk po investojmë asnjë para.”
Sipas Trumpit, marrëveshja e paqes është afër finalizimit dhe mund të nënshkruhet brenda pak ditësh, me ceremoninë zyrtare që pritet të zhvillohet në Zvicër./teve1.info/
