Në një intervistë të dhënë mëngjesin e sotëm për “Fox & Friends”, presidenti amerikan, Donald Trump shprehu optimizëm lidhur me mundësinë e arritjes së një marrëveshjeje paqeje për t’i dhënë fund pushtimit rus të Ukrainës.
Sipas Trump, ekziston potenciali për një zgjidhje, por kjo do të kërkojë që Ukraina të bëjë lëshime të konsiderueshme.
Megjithëse nuk dha detaje të qarta për planin e tij të mundshëm, Trump theksoi se Kievi do të duhet të heqë dorë nga disa prej aspiratave të tij kryesore.
“Ukraina do të duhet të lërë mënjanë si shpresën e saj për një Krime të rikthyer, të cilën Rusia e pushtoi me forcë në vitin 2014, ashtu edhe aspiratat e saj për t’u bashkuar me aleancën ushtarake të NATO-s,” tha Trump. “Të dyja këto gjëra janë të pamundura,” shtoi ai.
Ndërkohë, sipas burimeve diplomatike të cituara nga Associated Press, presidenti rus, Vladimir Putin, si pjesë e çdo marrëveshjeje të mundshme, po kërkon që Ukraina të tërheqë trupat e saj nga rajonet e Donetskut dhe Luhanskut, si dhe të njohë Krimenë si territor rus.
Këto kushte kanë qenë prej kohësh të papranueshme për Kievin, i cili këmbëngul në sovranitetin e plotë mbi territoret e pushtuara dhe në të drejtën për t’u bashkuar me NATO-n./teve1
