Në një zhvillim të rëndësishëm diplomatik, Presidenti amerikan Donald Trump ka deklaruar se po shqyrton mundësinë e heqjes së sanksioneve ekonomike të SHBA-së ndaj Sirisë, duke e cilësuar këtë hap si një përpjekje për t’i dhënë Damaskut një “fillim të ri”.
Sipas Trump, vendimi është ende në shqyrtim, por kërkesat për një ndryshim të këtij kursi janë shtuar, përfshirë edhe një apel nga Presidenti turk, Rexhep Tajip Erdogan, ka raportuar Anadoly.
“Presidenti Erdogan më ka kërkuar që të shqyrtojmë heqjen e sanksioneve dhe shumë të tjerë gjithashtu. Do të marrim një vendim për këtë së shpejti. Nuk po i japin ndonjë përparësi të madhe Sirisë, kështu që duam të shohim nëse mund të ndihmojmë,” tha Trump gjatë një deklarate për shtyp në Shtëpinë e Bardhë.
Komentet e Trump vijnë në një kohë kur Siria përballet me nevojën për rindërtim pas gati 15 vitesh konflikti të përgjakshëm civil, i cili ka shkatërruar infrastrukturën dhe ka zhvendosur miliona qytetarë.
Një vendim për lehtësimin ose heqjen e sanksioneve mund të sinjalizojë një ndryshim të madh në qasjen perëndimore ndaj Damaskut dhe mund të hapë rrugën për përpjekje të reja për stabilitet në rajon.
Ndërkohë, edhe Bashkimi Evropian po tregon shenja të një qëndrimi më fleksibël. Presidenti francez Emmanuel Macron, pas një takimi me Presidentin sirian Ahmed al-Sharaa në Paris, deklaroi se BE-ja është e gatshme të fillojë një proces të heqjes graduale të sanksioneve ekonomike ndaj Sirisë.
“Nëse autoritetet siriane vazhdojnë në rrugën e reformave dhe stabilizimit, ne do të përputhim qasjen tonë përmes një procesi të kujdesshëm dhe të koordinuar me partnerët tanë ndërkombëtarë, përfshirë edhe Shtetet e Bashkuara,” u shpreh Macron.
Ai theksoi gjithashtu se blloku do të punojë me agjencitë ndërkombëtare për të mundësuar kthimin e refugjatëve sirianë në vendin e tyre.
Franca, sipas Macron, do të luajë një rol udhëheqës në sigurimin që ndihma ndërkombëtare të përdoret në mënyrë transparente dhe për të përmbushur prioritetet kryesore për stabilitetin dhe unitetin e Sirisë, të cilat ai i quajti “të domosdoshme për sigurinë e Lindjes së Mesme”.
Këto sinjale nga SHBA dhe BE sugjerojnë një mundësi të re për integrimin e Sirisë në arenën ndërkombëtare dhe për të filluar një proces të gjatë të rindërtimit kombëtar dhe pajtimit.
