Presidentja meksikane Claudia Sheinbaum njoftoi të hënën se tarifat prej 25% të vendosura nga presidenti amerikan, Donald Trump më 1 shkurt do të pezullohen për një muaj.
Në një deklaratë në llogarinë e saj X, Sheinbaum tha se kishte një telefonatë me Trump, gjatë së cilës të dy liderët arritën marrëveshje për kufirin e tyre të përbashkët dhe trafikun e fentanilit.
Si pjesë e angazhimeve të Meksikës, Sheinbaum tha se 10,000 trupa të Gardës Kombëtare do të vendosen përgjatë kufirit SHBA-Meksikë për të luftuar kontrabandën e fentanilit. Në këmbim, SHBA u zotua të frenojë kontrabandën e armëve në Meksikë, raporton AA.
Sheinbaum njoftoi gjithashtu se tarifat do të pezulloheshin për një muaj, duke lehtësuar përkohësisht tensionet pasi Trump përmbushi premtimin e tij për të vendosur një tarifë prej 25% për të gjitha mallrat meksikane – një veprim që kishte ngjallur kundërshtim të fortë nga zyrtarët meksikanë.
Trump konfirmoi bisedën në Truth Social, duke e përshkruar atë si “shumë miqësore”. Ai deklaroi se Sheinbaum kishte rënë dakord të vendoste menjëherë 10,000 trupa meksikane në kufi për të ndaluar fluksin e fentanilit dhe emigrantëve të paligjshëm në SHBA.
“Ne ramë dakord më tej që të ndalojmë menjëherë tarifat e parashikuara për një periudhë njëmujore gjatë së cilës do të kemi negociata të kryesuara nga Sekretari i Shtetit Marco Rubio, Sekretari i Thesarit Scott Bessent dhe Sekretari i Tregtisë Howard Lutnick dhe përfaqësues të nivelit të lartë të Meksikës. Mezi pres të marr pjesë në ato negociata, me Presidentin Sheinbaum, ndërsa ne përpiqemi të arrijmë një ‘marrëveshje’ midis dy vendeve tona”, ka shkruar Trump.
