Presidenti amerikan, Donald Trump deklaroi të martën se trupat amerikane nuk do të dërgohen për të mbrojtur Ukrainën nga agresioni rus, duke sqaruar një pozicion që kishte mbetur i paqartë një ditë më parë.
Në një intervistë për “Fox & Friends” në Fox News Channel, Trump ofroi garanci se SHBA nuk do të angazhohet ushtarakisht në mbrojtje të kufijve të Ukrainës.
“Epo, ju keni garancinë time dhe unë jam president,” tha Trump, duke theksuar se angazhimi i trupave amerikane në terren nuk është në planet e tij.
Deklaratat e Trump vijnë një ditë pas takimeve intensive në Shtëpinë e Bardhë mes tij, presidentit ukrainas Volodymyr Zelenskyy dhe liderëve të tjerë evropianë, ku u diskutua gjerësisht për përfundimin e luftës së Rusisë kundër Ukrainës dhe ofrimin e garancive të sigurisë për Kievin.
Gjatë këtyre diskutimeve, Trump nuk përjashtoi plotësisht mundësinë e përfshirjes amerikane në një përpjekje të udhëhequr nga Evropa për të mbështetur mbrojtjen e Ukrainës – çka nxiti reagime dhe kërkoi sqarim publik.
Zëdhënësja e Shtëpisë së Bardhë, Karoline Leavitt, e konfirmoi më vonë se “çizmet amerikane nuk do të jenë në terren” si pjesë e ndonjë misioni të mundshëm paqeruajtës, citon AP.
Në të njëjtën intervistë televizive, Trump u komentoi për aspiratat e Ukrainës për t’u anëtarësuar në NATO, si dhe për shpresat për të rikthyer Gadishullin e Krimesë, i cili është pushtuar nga Rusia që prej vitit 2014. Sipas tij, këto synime janë “të pamundura”.
