Donald Trump ka filluar turneun e tij të parë të madh ndërkombëtar të mandatit të tij të dytë si president, ku do të vizitojë shtetet e Gjirit gjatë katër ditëve të ardhshme për bisedime dypalëshe.
Ai fillimisht po viziton Arabinë Saudite ku u mirëprit nga kreu i mbretërisë, Mohammed bin Salman.
Rëndësia ekonomike e Lindjes së Mesme për Trumpin theksohet nga fakti se vizita në Arabinë Saudite duhej të ishte udhëtimi i parë jashtë shtetit i mandatit të tij të dytë në Shtëpinë e Bardhë.
Kjo ndodhi përpara se vdekja e Papa Françeskut ta bënte të nevojshme që Trump të merrte pjesë në funeralin e tij në Romë drejt fundit të prillit.
Arabia Saudite ishte gjithashtu vendi i parë që Trump vizitoi gjatë mandatit të tij të parë, duke shkuar kundër praktikës moderne të presidentëve amerikanë për të filluar me Mbretërinë e Bashkuar, Kanadanë ose Meksikën.
Sigurimi i investimeve të reja në SHBA nga shtetet e Gjirit, dhe veçanërisht nga fondet e tyre sovrane të pasurisë të mbështetura nga shtetet, do ta ndihmojë Trumpin të sinjalizojë në vend se axhenda e tij “Amerika e Para” po jep rezultate.
Fondi sovran i pasurisë i Arabisë Saudite, fondi i Investimeve Publike (PIF), i cili kontrollon asete me vlerë 925 miliardë dollarë, tashmë ka investime të shumta në SHBA. Këto përfshijnë Uber, firmën e lojërave elektronike Electronic Arts dhe firmën e makinave elektrike Lucid.
Poashtu, një marrëveshje që Arabia Saudite të blejë armë dhe pajisje të tjera ushtarake amerikane me vlerë mbi 100 miliardë dollarë raportohet gjerësisht të jetë ndër marrëveshjet që Trump pritet të shpallë gjatë këtij udhëtimi, ka raportuar BBC.
Raketat, sistemet e radarëve dhe avionët e transportit thuhet se janë pjesë e paketës.
SHBA-të kanë qenë prej kohësh një furnizues armësh për Arabinë Saudite, por kjo marrëdhënie u prish në vitin 2021 kur administrata Biden ndaloi shitjen e armëve sulmuese në Riad, duke përmendur shqetësime në lidhje me rolin e vendit në luftën në Jemenin fqinj.
