Presidenti amerikan Donald Trump ka thënë se sulmi i ShBA-së ndaj Iranit ka qenë i suksesshëm duke shtuar se Iranit ia kanë hequr “bombën” nga duart.
Ai këtë e ka thënë në një reagim ndaj kongresmenit republikan Thomas Massie, pasi ky i fundit kritikoi sulmet ushtarake të SHBA-së ndaj Iranit duke i cilësuar si “jo kushtetuese”.
“Patëm një sukses spektakolar ushtarak dje, duke ia hequr ‘bombën’ nga duart (dhe do ta përdornin po të mundnin!), por, si gjithmonë, dhe pavarësisht gjithë lavdërimeve dhe vlerësimeve që morëm, ky kongresmen ‘i lehtë’ është kundër asaj që u arrit aq shkëlqyeshëm mbrëmë në Iran”, ka shkruar ai në rrjetin social Truth
Ai ka vlerësuar si politikan jo-produktiv kongresmenin që dha kritika për sulmin.
“MAGA nuk ka të bëjë me politikanë dembelë, shfaqës dhe jo-produktivë, dhe Thomas Massie është padyshim një prej tyre. Faleminderit ushtrisë sonë të jashtëzakonshme për punën E MREKULLUESHME që bënë mbrëmë. Ishte me të vërtetë E VEÇANTË!!!”, ka shkruar ai.
Massie, një zë kritik brenda Partisë Republikane, ka qenë shpesh në kontrast me qëndrimet ndërhyrëse ushtarake të administratave amerikane, duke theksuar nevojën për respektimin e Kushtetutës në vendimet për luftë.
