Presidenti amerikan, Donald Trump ka nënshkruar një urdhër ekzekutiv për shkurtimin e fondeve ndaj organizatës globale dhe të pavarur të lajmeve, Zëri i Amerikës, që financohej nga fondet federale.
Urdhëri i presidentit synon kompaninë mëmë të Zërit të Amerikës, US Agency for Global Media që financon poashtu entitete jofimitprurëse si Radio Evropa e Lirë dhe Radio Azia e Lirë.
Ai gjithashtu kërkon nga krerët e atyre agjencive që të “ulin performancën… në praninë dhe funksionin minimal të kërkuar nga ligji”.
Mike Abramoëitz, drejtori i Zërit të Amerikës, tha se ai dhe pothuajse i gjithë stafi i tij prej 1300 personash ishin vënë në pushim me pagesë, raporton BBC.
Abramoëitz tha se urdhri e la Zërin e Amerikës të paaftë për të kryer “misionin e tij jetik… veçanërisht kritik sot, kur kundërshtarët e Amerikës, si Irani, Kina dhe Rusia, po fundosin miliarda dollarë në krijimin e narrativave të rreme për të diskredituar Shtetet e Bashkuara”.
Nuk ka asnjë shpjegim nga administrata Trump dhe nuk është ende e qartë nëse stacionet po mbyllen plotësisht.
Një burim i tha CBS se të gjithë punëtorëve të pavarur dhe kontraktorëve ndërkombëtarë iu tha se tani nuk kishte para për t’i paguar ata.
Presidenti amerikan shkurtoi gjithashtu fondet për disa agjenci të tjera federale – duke përfshirë ato përgjegjëse për parandalimin e të pastrehëve dhe financimin e muzeve dhe bibliotekave.
Zëri i Amerikës u lançua në vitin 1942 me mandat për të luftuar propagandën naziste dhe japoneze. Transmetimi i tij i parë – i bërë në një transmetues të huazuar në SHBA nga BBC – deklaroi një qëllim modest.
Në vitin 2013, një ndryshim në legjislacion i lejoi Zërit të Amerikës dhe filialeve të fillonin transmetimin në SHBA.
