Presidenti Donald Trump ka thënë se beson se SHBA-ja do të fitojë kontrollin e Grenlandës, pasi rishfaqi interes për marrjen e territorit autonom danez në javët e fundit.
“Unë mendoj se do ta kemi atë,” u tha ai gazetarëve në Air Force One të shtunën, duke shtuar se 57,000 banorët e ishullit “duan të jenë me ne”.
Komentet e tij vijnë pasi u raportua se kryeministrja daneze Mette Frederiksen këmbënguli se Grenlanda nuk është në shitje në një telefonatë me presidentin javën e kaluar, raporton BBC.
Trump shfaqi ambicien e tij për blerjen e territorit të gjerë të Arktikut gjatë mandatit të tij të parë në vitin 2019 dhe ka thënë se kontrolli amerikan i Grenlandës është një “domosdoshmëri absolute” për sigurinë ndërkombëtare.
“Unë nuk e di vërtet se çfarë pretendimi ka Danimarka ndaj saj, por do të ishte një akt shumë armiqësor nëse ata nuk do të lejonin që kjo të ndodhte sepse është për mbrojtjen e botës së lirë,” shtoi ai.
“Unë mendoj se Grenlandën do ta marrim sepse ka të bëjë me lirinë e botës”, vazhdoi Trump.
“Nuk ka të bëjë fare me Shtetet e Bashkuara përveç se ne jemi ata që mund të sigurojmë lirinë. Ata nuk munden.”
Pavarësisht besimit të dukshëm të Trump, kryeministrat e Grenlandës dhe Danimarkës kanë thënë më parë se ishulli nuk ishte në shitje.
Grenlanda shtrihet në rrugën më të shkurtër nga Amerika e Veriut në Europë, duke e bërë atë strategjikisht të rëndësishme për SHBA-në. Ajo është gjithashtu shtëpia e një objekti të madh hapësinor amerikan.
Vitet e fundit, ka pasur një interes në rritje për burimet natyrore të Grenlandës, duke përfshirë minierat për minerale të rralla të tokës, uranium dhe hekur.
Megjithëse ishulli ka një autonomi të gjerë, ai mbetet pjesë e mbretërisë së Demarkut.
Ka disa mënyra se si Trump mund të ndjekë dëshirën e tij për të marrë territorin. I pyetur më herët në janar nëse ai mund të përjashtonte përdorimin e forcës ushtarake apo ekonomike, Trump tha se nuk e përjashton.
Komentet e tij të fundit kanë shkaktuar tronditje në establishmentin politik danez, duke shkaktuar takime të organizuara me nxitim, të nivelit të lartë në Kopenhagë në fillim të këtij muaji .
