Gjatë një darke shtetërore në Katar të mërkurën, Presidenti Donald Trump i kërkoi Emirit Sheikh Tamim bin Hamad Al Thani të përdorë ndikimin e tij mbi Iranin për të ndihmuar në arritjen e një marrëveshjeje për ngadalësimin e programit bërthamor iranian.
Trump paralajmëroi se situata po bëhet e rrezikshme dhe kërkoi një zgjidhje diplomatike për të shmangur një konflikt të mundshëm.
Trump tha se Shtetet e Bashkuara nuk do të hezitojnë të përdorin forcën nëse është e nevojshme, por theksoi se dëshiron një marrëveshje dhe jo luftë.
Ai i bëri thirrje Iranit që të ndalë sponsorizimin e grupeve si Hamasi, Hezbollahu dhe Huthët, si dhe të ndalojë përfundimisht dhe në mënyrë të verifikueshme ndjekjen e armëve bërthamore.
Emiri i Katarit deklaroi se është pro një rajoni pa armë bërthamore, por mbrojti të drejtën e Iranit për energji bërthamore civile dhe theksoi se zgjidhja duhet të jetë diplomatike, raporton AP.
Marrëveshja bërthamore e vitit 2015 u anulua gjatë mandatit të parë të Trump. Sot, Irani pasuron uranium deri në 60%, shumë afër nivelit të nevojshëm për armë bërthamore.
SHBA dhe Irani janë përfshirë në katër raunde bisedimesh që nga muaji i kaluar, por Trump paralajmëroi se dritarja për marrëveshje po ngushtohet.
Në një takim të mëparshëm të Këshillit të Bashkëpunimit të Gjirit në Riad, Trump tha se Teherani duhet të ndalë mbështetjen për konfliktet rajonale dhe terrorizmin, për të qenë pjesë e çdo marrëveshjeje të ardhshme.
Nga ana tjetër, Irani reagoi përmes Ministrit të Jashtëm Abbas Araghchi, i cili i cilësoi komentet e Trumpit si “mashtruese”, por nuk iu përgjigj drejtpërdrejt kërkesave.
