Presidenti i Shteteve të Bashkuara, Donald Trump, deklaroi se mesazhi i tij për Presidentin rus Vladimir Putin ishte se lufta në Ukrainë duhet të marrë fund, pas asaj që ai e përshkroi si diskutime “të mira” me Presidentin ukrainas Volodymyr Zelenskiy në Davos të enjten.
Zyrtarët amerikanë dhe ukrainas janë angazhuar në javë të tëra diplomacie intensive, ndërsa Kievi përballet me presion nga Trump për të siguruar paqen në konfliktin gati katërvjeçar.
Pas një takimi me udhëheqësin ukrainas që zgjati afërsisht një orë, Trump e përshkroi diskutimin si “të mirë”, por nuk dha detaje të mëtejshme në lidhje me përmbajtjen e bisedimeve të tyre.
“Mendoj se takimi me Presidentin Zelenskiy ishte i mirë. Është një proces i vazhdueshëm”, u tha Trump gazetarëve, duke vënë në dukje se të dërguarit e SHBA-së po shkonin në Moskë për bisedime të enjten.
Kur u pyet se cili ishte mesazhi i tij për Putinin, Trump u përgjigj: “Lufta duhet të marrë fund.”
Kurse, Zelenskyy e quajti takimin e tij me Trumpin “produktiv dhe përmbajtjesor” në një postim të enjten në mediat sociale.
Presidenti ukrainas tha në X se ai dhe Trump folën për mbrojtjen ajrore për Ukrainën. Zelensky shkroi gjithashtu se e falënderoi udhëheqësin amerikan për paketën e mëparshme të raketave të mbrojtjes ajrore, ndërsa kërkoi edhe një shtesë.
“Takimi ynë i mëparshëm me Presidentin Trump ndihmoi në forcimin e mbrojtjes së qiejve tanë dhe shpresoj që këtë herë do ta forcojmë atë edhe më tej”, tha ai.
Zelensky tha poashtu se dokumentet për një marrëveshje për t’i dhënë fund luftës në Ukrainë janë “pothuajse, pothuajse gati”.
Disa nga dokumentet kërkojnë garanci sigurie, ndërsa të tjera mbulojnë plane ekonomike për të ardhmen e Ukrainës.
