Presidenti i SHBA-së, Donald Trump, ka deklaruar se në rast se Bashkimi Evropian nuk i përmbush zotimet e veta për investime në kuadër të marrëveshjes BE–SHBA, atëherë blloku do të përballet me vendosjen e tarifave deri në 35%.
“Ata i ulën tarifat e tyre. Ata paguan 600 miliardë dollarë dhe për shkak të kësaj unë ua uli tarifat nga tridhjetë përqind në pesëmbëdhjetë përqind, dhe disa vende thanë: ‘Si ka mundësi që BE-ja po paguan më pak se ne?’ , dhe unë thashë mirë, sepse më dhanë 600 miliardë dollarë.”
Duke komentuar më tej mbi këtë shumë, Trump theksoi: “Kjo është një dhuratë, nuk është si, e dini, një kredi… ata na dhanë 600 miliardë dollarë që mund t’i investojmë në çfarëdo që duam.”
Sipas Trump, qëllimi është që vendet e Bashkimit Evropian t’i japin fund praktikave të padrejta tregtare që, sipas tij, kanë dëmtuar ekonominë amerikane për vite me radhë:
“Ata na kanë lodhur për kaq shumë vite saqë është koha që të paguajnë dhe duhet të paguajnë.”
Gjatë fjalës së tij, ai kritikoi edhe kryeministren e Zvicrës, duke pohuar se ajo “nuk donte t’i dëgjonte” argumentet e tij.
Trump përmendi edhe temën e produkteve farmaceutike, duke deklaruar:
“Ata bëjnë pasuri me produktet farmaceutike, dhe fitojnë në Kinë, Irlandë dhe gjithçka tjetër”, dhe se ai do të njoftojë tarifa të veçanta mbi to “brenda javës së ardhshme ose më shpesh”.
Presidenti amerikan theksoi se fillimisht do të vendoset një tarifë e vogël për produktet farmaceutike , por brenda një viti ose një viti e gjysmë, do të shkojë në 150% dhe pastaj do të shkojë në 250%. Me këtë ai synon të nxisë prodhimin e produkteve farmaceutike në vend./teve1/
