Në një telefonatë ekskluzive për BBC-në, Donald Trump tha se është i zhgënjyer me Vladimir Putinin, por nuk e ka përfunduar ende me të.
I pyetur nëse i beson udhëheqësit rus, presidenti amerikan u përgjigj: “Nuk i besoj pothuajse askujt.”
Deklaratat e Trump vijnë vetëm pak orë pasi ai njoftoi plane për dërgimin e armëve në Ukrainë dhe paralajmëroi për tarifa të ashpra ndaj Rusisë nëse nuk arrihet një marrëveshje armëpushimi brenda 50 ditësh.
Në intervistën prej 20 minutash për BBC-në, pas takimit me Sekretarin e Përgjithshëm të NATO-s, Mark Rutte, Trump kaloi një pjesë të konsiderueshme të intervistës duke folur gjerësisht për zhgënjimin e tij me udhëheqësin rus..
Lidhur me përpjekjet për paqe, Trump tregoi se kishte pasur katër tentativa për të arritur një marrëveshje me Rusinë për t’i dhënë fund luftës në Ukrainë, por pa sukses.
I pyetur se si Trump do ta bindte Putinin të “ndalonte gjakderdhjen”, presidenti amerikan tha: “Po punojmë për këtë, Gary.”
“Kemi një bisedë të shkëlqyer. Them: ‘Kjo është mirë, mendoj se jemi afër përfundimit’, dhe pastaj ai do të shemb një ndërtesë në Kiev.
“I pyetur nëse atentati ndaj tij vitin e kaluar e kishte ndryshuar, Trump tha se përpiqet të mos mendojë për këtë: “Nuk më pëlqen të mendoj nëse kjo më ka ndryshuar mua… por, po të ndalem gjatë, mund të më ndryshojë jetën.”
Ndërkohë, Rusia ka rritur ndjeshëm sulmet ndaj qyteteve ukrainase, duke shkaktuar viktima në mesin e civilëve.
Presidenti rus Vladimir Putin ka deklaruar se dëshiron paqe, por insiston që “shkaqet rrënjësore” të konfliktit – që sipas tij përfshijnë kërcënimet nga NATO dhe Perëndimi – duhet të zgjidhen më parë.
