Presidenti amerikan, Donald Trump, ka lënë të kuptohet se Shtetet e Bashkuara kanë ndaluar përkohësisht diplomacinë me Teheranin, për shkak të shtypjes së protestave antiqeveritare në Iran.
Në një postim në rrjetet sociale, Trump iu drejtua drejtpërdrejt qytetarëve iranianë, duke i inkurajuar ata të vazhdojnë protestat:
“Patriotë iranianë, VAZHDONI TË PROTESTONI – MERRNI NË DORË INSTITUCIONET TUAJA!!! Ruani emrat e vrasësve dhe abuzuesve”, shkroi Trump në një postim në rrjetet sociale.
Presidenti amerikan shtoi se administrata e tij ka ndërprerë çdo kontakt diplomatik me zyrtarët iranianë, duke e kushtëzuar rifillimin e bisedimeve me ndalimin e dhunës ndaj protestuesve:
“Ata do të paguajnë një çmim të lartë. Kam anuluar të gjitha takimet me zyrtarët iranianë derisa të ndalet vrasja e pakuptimtë e protestuesve. NDIHMA ËSHTË RRUGËS SË SAJ. MIGA!!!”
Termi “MIGA” i përdorur nga Trump i referohet sloganit “Bëjeni Iranin përsëri të madh”, një variant i sloganit të tij të njohur politik “Bëjeni Amerikën përsëri të madhe”.
Në një deklaratë tjetër, Trump paralajmëroi edhe masa ekonomike ndaj Iranit dhe vendeve që bashkëpunojnë me të.
Ai tha se çdo shtet që bën biznes me Iranin do të përballet me një normë tarifore prej 25% në tregtinë me Shtetet e Bashkuara.
Presidenti amerikan më parë ka thënë se po shqyrton edhe opsione ushtarake për të goditur Iranin, si reagim ndaj mënyrës se si autoritetet iraniane kanë trajtuar protestat antiqeveritare.
Irani ka akuzuar SHBA-në dhe Izraelin se kanë nxitur trazirat dhe dhunën në vend si përpjekje për të ndërruar pushtetin./teve1
