Presidenti amerikan Donald Trump i ka bërë thirrje Iranit të arrijë një marrëveshje për programin e tij bërthamor, duke thënë se i ka dhënë Teheranit “mundësi pas mundësie”.
Bisedimet mes SHBA-së dhe Iranit për një marrëveshje ishin drejt hyrjes në raundin e tyre të gjashtë të dielën.
“U kam thënë atyre, me fjalët më të forta, që ‘thjesht ta bëjnë’, por sado që u përpoqën, sado afër që u duk se arritën, nuk ia dolën,” shkruan Trump në platformën Truth Social.
“Ka pasur tashmë shumë vdekje dhe shkatërrim, por ende ka kohë që kjo masakër – me sulmet e tjera të planifikuara që do jenë edhe më brutale – të marrë fund. Irani duhet të bëjë një marrëveshje, para se të mos mbetet më asgjë, dhe të shpëtojë atë që dikur njihej si Perandoria Iraniane. Jo më vdekje, jo më shkatërrim — THJESHT BËJE, PARA SE TË JETË SHUMË VONË”, ka shkruar ai.
Më herët, Trump kishte deklaruar se ishte në dijeni të planeve të Izraelit përpara se ata të ndërmerrnin sulmet gjatë natës, por e bëri të qartë se ushtria amerikane nuk ka marrë pjesë në operacion.
