Presidenti amerikan, Donald Trump u ka thënë gazetarëve të dielën se zyrtarët amerikanë kanë përcaktuar se Ukraina nuk shënjestroi një rezidencë që i përkiste Presidentit rus Vladimir Putin në një sulm me dron javën e kaluar.
Ministri i Jashtëm rus Sergey Lavrov javën e kaluar tha se Ukraina nisi një valë dronësh në rezidencën shtetërore të Putinit në rajonin veriperëndimor të Novgorodit, të cilat sistemet mbrojtëse ruse arritën t’i mposhtnin.
Lavrov gjithashtu kritikoi Kievin për nisjen e sulmit në një moment negociatash intensive për t’i dhënë fund luftës.
Trump tha se “diçka ka ndodhur afër” rezidencës së Putinit, por zyrtarët amerikanë nuk zbuluan se rezidenca e presidentit rus ishte në shënjestër, transmeton Asssociated Press.
“Nuk besoj se ka ndodhur ai sulm”, u tha Trump gazetarëve ndërsa udhëtoi për në Uashington të dielën, pasi kaloi dy javë në shtëpinë e tij në Florida. “Ne nuk besojmë se ka ndodhur kjo, tani që kemi qenë në gjendje ta verifikojmë.”
Por Trump, të paktën fillimisht, dukej se i kishte marrë akuzat ruse si të mirëqena. Ai u tha gazetarëve të hënën e kaluar se Putini e kishte ngritur çështjen edhe gjatë një telefonate që pati me udhëheqësin rus më herët atë ditë. Dhe Trump tha se ishte “shumë i zemëruar” për akuzën.
Akuza e Kremlinit erdhi vetëm një ditë pasi Presidenti ukrainas Volodymyr Zelenskyy udhëtoi për në Florida për bisedime me Trump mbi planin 20-pikësh të administratës amerikane, i cili është ende në zhvillim e sipër, që synon t’i japë fund luftës .
Zelensky e mohoi akuzën menjëherë.
