Kandidati republikan Donald Trump fitoi zgjedhjet paraprake në Karolinën e Jugut të shtunën, duke mposhtur lehtësisht ish ambasadoren amerikane në Kombet e Bashkuara Nikki Haley dhe duke konsoliduar më tej rrugën drejt një emërimi të tretë republikan për postin e presidentit.
Zonja Haley, e cila ka qënë guvernatore e Karolinës së Jugut, po përballet me trysni në rritje për t’u larguar nga gara, por thotë se nuk do të largohet pavarësisht se humbi në shtetin që drejtoi nga viti 2011 deri më 2017.
Një përballje e re mes zotit Trump dhe Presidentit Joe Biden po bëhet gjithnjë e më e pashmangshme. Zonja Haley është zotuar se do ta vazhdojë garën deri më 5 mars, në atë që njihet si Super e Marta, ku pesëmbëdhjetë shtete do të mbajnë votime paraprake për të zgjedhur kandidatin republikan për president. Por ajo nuk ishte në gjendje të zvogëlonte vrullin e zotit Trump në shtetin e saj të origjinës, pavarësisht se mbajti shumë më tepër tubime në kuadër të fushatës dhe argumentoi se aktakuzat kundër zotit Trump do ta pengojnë atë në garën me Presidentin Biden.
“Kurrë nuk e kam parë Partinë Republikane kaq të bashkuar sa është tani”, deklaroi zoti Trump në fjalimin e tij të fitores vetëm pak çaste pas mbylljes së votimeve.
Zgjedhjet paraprake në Karolinën e Jugut historikisht kanë shërbyer si një pikë orientimi në procesin e emërimit të kandidatit republikan. Që nga viti 1980, fituesi i zgjedhjeve paraprake republikane në Karolinën e Jugut ka marrë emërimin për ta përfaqësuar Partinë Republikane në zgjedhjet presidenciale. Përjashtimi i vetëm ishte rasti i kandidatit Newt Gingrich në vitin 2012.
Zoti Trump dominoi në të gjithë shtetin, madje kryesoi në qarkun Lexington, të cilin zonja Haley e përfaqësonte në trupin ligjvënës të shtetit. Shumë nga votuesit e Karolinës së Jugut, madje edhe disa që më parë e mbështetën zonjën Haley gjatë kohës së saj si guvernatore, nuk ishin të gatshëm t’i jepnin votën asaj.
“Ajo ka bërë disa gjëra të mira”, tha 36-vjeçari Davis Paul, teksa priste zotin Trump në një tubim në Conëay. “Por unë thjesht nuk mendoj se ajo është e gatshme të përballet me një kandidat si Trumpi. Nuk mendoj se shumë njerëz munden”.
Në selinë e zonjës Haley të shtunën mbrëma, mbështetësit tundnin pankartat para një ekrani të madh që shfaqte fjalimin e zotit Trump, duke e bllokuar pamjen. Kjo, natyrisht, nuk e bëri humbjen më pak dërrmuese.
Rreth një orë më vonë, zonja Haley doli në skenë dhe tha se, “ajo që pashë sot ishte zhgënjimi i Karolinës së Jugut me drejtimin e vendit tonë. Unë e kam parë të njëjtin zhgënjim në mbarë vendin”.
“Unë nuk besoj se Donald Trump mund ta mposhtë Joe Bidenin”, tha zonja Haley, duke shtuar më vonë se, “unë e thashë në fillim të kësaj jave se pavarësisht se çfarë ndodh në Karolinën e Jugut, unë do të vazhdoj të kandidoj. Unë jam një grua e fjalës”.
Donald Trump dhe Joe Biden tashmë po sillen si kandidatë që do të përballen në nëntor./voa
