Presidenti amerikan, Donald Trump ka pranuar zyrtarisht një ftesë nga Mbreti Charles III për t’u bashkuar me të dhe Mbretëreshën Camilla për një vizitë të dytë shtetërore, tha Pallati i Buckinghamit.
Trump do të shoqërohet nga bashkëshortja e tij, Melania Trump, për udhëtimin – i cili do të zhvillohet nga 17 deri më 19 shtator – dhe do të mirëpritet në Kështjellën e Windsorit.
Vendndodhja për vizitën shtetërore u zgjodh pasi vendi tipik, Pallati i Buckinghamit, vazhdon t’i nënshtrohet rinovimeve.
Trump u prit nga Mbretëresha Elizabeth II për vizitën e tij të parë shtetërore në vitin 2019 gjatë mandatit të tij të parë.
Tradicionalisht, presidentëve të mandatit të dytë nuk u ofrohet një vizitë shtetërore dhe në vend të kësaj janë ftuar për çaj ose drekë me monarkun.
Një program i plotë ngjarjesh nuk është njoftuar ende, por, si të gjitha vizitat e këtij lloji, ajo do të përfshijë një ceremoni të plotë mirëseardhjeje dhe një pritje shtetërore në Sallën e Shën Gjergjit në Kështjellën e Windsorit.
Të gjithë anëtarët e lartë të Familjes Mbretërore do të jenë të përfshirë, përfshirë Princin dhe Princeshën e Uellsit, të cilët jetojnë në territorin e kështjellës.
Presidenti francez, Emmanuel Macron u prit nga Mbreti në Windsor javën e kaluar, duke shënuar herën e parë që një vizitë shtetërore mbahej në rezidencën Berkshire për më shumë se një dekadë.
Çdo vizitë nga një president amerikan sjell me vete sfida sigurie, dhe programi i Trump nuk ka gjasa të përfshijë ngjarje që janë të hapura për publikun.
Është gjithashtu e paqartë nëse Trump do të ketë mundësinë të flasë me parlamentarët, gjë që shpesh përfshihet në programin e një vizite shtetërore.
Në shkurt, kryeministri Keir Starmer i paraqiti Trumpit një letër nga Mbreti duke e ftuar atë për vizitën në Shtëpinë e Bardhë.
Ndërsa, dyshja ishte ulur pranë njëri-tjetrit në Zyrën Ovale, Trump tha se ishte një “nder i madh, i madh”, duke shtuar: Dhe kjo thotë në Windsor – kjo është vërtet diçka”.
Vizita shtetërore do të vijë disa muaj pasi Mbreti vizitoi Kanadanë, ku hapi parlamentin e vendit për të shënuar fillimin zyrtar të udhëheqjes së kryeministrit Mark Carney.
Shumë kanadezë e panë vizitën dy-ditore të Mbretit në Ottawa në maj si një simbol të mbështetjes për vendin pasi Trump vendosi tarifa për një nga partnerët e tij më të mëdhenj tregtarë dhe kërcënoi ta bënte atë shtetin e 51-të të SHBA-së.
Joshja e një vizite shtetërore për Trump ka potencialin të jetë një mjet i fuqishëm i diplomacisë së butë nga qeveria britanike ndaj një presidenti që është një monarkist i flaktë.
Duke folur në prill, ai tha: Unë jam një mik i Charles, kam respekt të madh për Mbretin Charles dhe familjen. Ne kemi vërtet një respekt të madh për familjen”.
Ftesa erdhi ndërsa Keir u përpoq të ndikonte te Trump mbi luftën në Ukrainë dhe të ulte tarifat e vendosura mbi eksportet e Mbretërisë së Bashkuar në SHBA – të dyja çështje që vazhdojnë të dominojnë të ashtuquajturën marrëdhënie të veçantë.
Presidenti amerikan pritet të jetë në Skoci më vonë këtë muaj për hapjen e fushës së tij të re të golfit në Aberdeenshire.
Fillimisht ishte menduar se Mbreti dhe Trump do të takoheshin në mënyrë jozyrtare gjatë atij udhëtimi.
Por, kuptohet se kishte sfida logjistike rreth datave dhe nuk do të ketë takim privat përpara vizitës së tij në shtator./KP/
