Presidenti amerikan, Donald Trump dhe sekretari i mbrojtjes i SHBA-së, Pete Hegseth kanë pranuar se kanë dyshime në lidhje me shkallën e dëmit të shkaktuar në centralet bërthamore të Iranit, pas bombardimeve amerikane.
Kjo vjen pas publikimit të një vlerësimi të Pentagonit se, në kundërshtim me deklaratat e aministratës amerikane, programi iranian ishte vonuar vetëm për disa muaj.
“Informacioni ishte shumë i paqarte”, u tha Trump gazetarëve në një samit të NATO-s në Hagë, duke futur një element pasigurie për herë të parë pas disa ditësh deklaratash të theksuara se shkatërrimi kishte qenë total.
“Informacionet e inteligjencës thonë se nuk e dimë. Mund të ketë qenë shumë e rëndë. Kjo është ajo që sugjeron inteligjenca.”
Gjatë ditës, pretendimet e Trump u bënë më të gjera, duke hedhur poshtë madje raportet nga mbikëqyrësi bërthamor, Agjencia Ndërkombëtare e Energjisë Atomike (IAEA), se stoku prej 400 kg i Iranit me uranium të pasuruar 60% nuk mund të llogaritej më dhe dukej se ishte zhvendosur.
Kurse, të mërkurën vonë, drejtori i CIA-s, John Ratcliffe, në kundërshtim me të deklaratat e mëparshme të inteligjencës, tha se të dhëna të besueshme të inteligjencës tregonin se programi bërthamor i Iranit ishte dëmtuar rëndë dhe do të duheshin vite për t’u rindërtuar.
Trump pretendoi se javën e ardhshme do të ketë një takim SHBA-Iran për të negociuar përsëri rreth programit bërthamor të Teheranit.
“Do të flasim me ta javën e ardhshme me Iranin, mund të nënshkruajmë një marrëveshje, nuk e di”, tha ai, përpara se të shtonte: “Nuk më intereson nëse kam një marrëveshje apo jo”.
Kurse, të mërkurën, sekretari i mbrojtjes e përshkroi dëmin ndaj objekteve bërthamore të Iranit nga bombardimet amerikane dhe izraelite si “të moderuar deri të rëndë”.
Ai u zotua se do të kishte një hetim të FBI-së për rrjedhjet e informacionit nga Pentagoni, por gjithashtu pretendoi se informacioni i rrjedhur ishte i rremë.
