Procesi i apelit mund të sjellë ndryshime në dënimet e shqiptuara ndaj katër ish-krerëve të UÇK-së.
Kështu vlerëson Nevenka Tromp, hulumtuese e Tribunalit Penal Ndërkombëtar për ish-Jugosllavinë dhe profesoreshë në universitetin e Amsterdamit.
Ajo në një intervistë me shkrim për TËVË1, ka thënë se mbrojtja mund të kundërshtojë mënyrën se si gjykata ka përcaktuar përgjegjësinë individuale të të dënuarve.
“Kryesorja është kundërshtimi i vetë ekzistencës së “qëllimit të përbashkët kriminal”, së bashku me mënyrën se si aktgjykimi e dalloi kontributin individual të katër të pandehurve”, ka thënë hulumtuese e Tribunalit Penal Ndërkombëtar, Nevenka Tromp.
Në apel sipas Tromp mund të shqyrtohen edhe provat e përdorura nga trupi gjykues, madje në në veçanti përmend dëshmitë e marra shumë vite pas ngjarjeve.
Ajo e sheh këtë si një tjetër pikë që mund të kundërshtohet nga mbrojtja.
“Një bazë e dytë e mundshme ka të bëjë me vetë materialin provues, veçanërisht me mbështetjen në deklaratat e dëshmitarëve, të marra shumë vite pas ngjarjeve në fjalë, të cilat ekipet e mbrojtjes pranë Dhomave të Specializuara i kanë kundërshtuar në procedura të mëparshme”, ka thënë tutje hulumtuese e Tribunalit Penal Ndërkombëtar, Nevenka Tromp
Por, në apel mund të ketë lëvizje edhe nga Prokuroria.
Nëse ajo apelon pjesën ku katër ish-krerët u shpallën të pafajshëm për krime kundër njerëzimit, procesi sipas profesoreshës dhe studiueses Tromp mund të marrë një tjetër drejtim.
“Një apel i Prokurorisë do të shënjestronte pjesën e aktgjykimit që aktualisht i jep mbrojtjes dhe Qeverisë së Kosovës bazën e tyre më të fortë retorike: shpalljen e pafajësisë për të gjashtë pikat e aktakuzës për krime kundër njerëzimit”, ka përfunduar hulumtuese e Tribunalit Penal Ndërkombëtar, Nevenka Tromp.
Procesi i apelit pritet të jetë i gjatë dhe rezultati, sipas Tromp mbetet i paparashikueshëm.
