Tribunali i Gazës, një “tribunal popullor” i pavarur i krijuar për të hetuar krimet e luftës të Izraelit në Gaza, zhvilloi ditën e tretë të seancës së tij të parë publike në Universitetin Ndërkombëtar të Sarajevës (IUS), kryeqytetin e Bosnjës dhe Hercegovinës.
Sesioni, që nisi më 26 maj dhe do të vijojë deri më 29 maj, u fokusua në temën “Historia, Etika dhe Filozofia” dhe bashkoi akademikë, ekspertë ligjorë, aktivistë të të drejtave të njeriut dhe përfaqësues nga shoqëria civile.
Diskutimet përfshinë një gamë të gjerë çështjesh, duke trajtuar historinë e spastrimit etnik, gjenocidin si krim shtetëror, rrënjët filozofike të gjenocidit në Gaza, zhvendosjen e palestinezëve, rezistencën palestineze, konceptin e “privilegjit të Holokaustit”, si dhe mohimin dhe propagandën rreth gjenocidit izraelit.
Temat përfshinin edhe analizën e narrativave qytetëruese, kulturën sioniste dhe sfidat e njohjes së këtyre krimeve.
Mes folësve kryesorë ishin kriminologia australiane, Penny Green, hulumtuesja, Nadera Shalhoub-Kevorkian dhe historiani, Ussama Makdisi, ka shkruan Anadoly.
Tribunali i Gazës u krijua zyrtarisht në nëntor 2024 në Londër, nga një koalicion akademikësh, intelektualësh, aktivistësh të të drejtave të njeriut dhe organizatash të shoqërisë civile.
Kjo iniciativë u ngrit si reagim ndaj “dështimit total të bashkësisë ndërkombëtare për të zbatuar ligjin ndërkombëtar” në lidhje me ngjarjet në Gaza.
Pas përfundimit të sesionit në Sarajevë, tribunali planifikon të mbajë seancën përfundimtare në tetor të këtij viti në Stamboll. Gjatë këtij eventi, Juri i Ndërgjegjes do të paraqesë draftin e gjetjeve dhe vendimeve bazuar në dëshmitë e dëshmitarëve dhe dëshmitë e palestinezëve të prekur nga konflikti.
Në fund të seancës, Deklarata e Sarajevës do të prezantohet për publikun, duke synuar të sjellë në vëmendje dhe të dokumentojë krimet e luftës në Gaza dhe të kërkojë llogaridhënie.
