Policia e Kosovës ka njoftuar se gjatë 24 orëve të fundit janë regjistruar tri raste vdekjeje, për të cilat janë iniciuar procedurat hetimore.
Sipas raportit zyrtar, në repartin e emergjencës në Gjilan është dërguar një burrë pa shenja jete, vdekja e të cilit është konstatuar nga ekipi mjekësor. Bazuar në deklaratat e dëshmitarëve, viktima kishte humbur vetëdijen dhe ishte rrëzuar përderisa ndodhej në vendin e punës. Me vendim të prokurorit, trupi i pajetë është dërguar në Institutin e Mjekësisë Ligjore për obduksion.
Një rast tjetër është raportuar në Shtime, ku nga Qendra Integruese Rehabilituese për persona me sëmundje kronike psikiatrike është njoftuar se një paciente kishte pësuar përkeqësim të gjendjes shëndetësore dhe më pas ka ndërruar jetë në Qendrën e Mjekësisë Familjare. Prokurori është njoftuar lidhur me rastin, ndërsa trupi i pajetë i është dorëzuar familjes për ceremoninë mortore.
Ndërkohë, në Leposaviq, autoritetet kanë pranuar një raport për një burrë që ishte gjetur pa shenja jete në banesën e tij. Mjeku ka konstatuar vdekjen, ndërsa familjarët kanë bërë të ditur se viktima jetonte i vetëm dhe nuk ishte përgjigjur në thirrjet telefonike. Në vendin e ngjarjes kanë dalë njësitë policore dhe zjarrfikësit, të cilët kanë hapur derën e banesës me forcë. Me urdhër të prokurorit, trupi është dërguar në IML për obduksion.
