Tri raste të dhunës në familje janë raportuar gjatë 24-orëve të fundit në Kosovë.
Policia e Kosovës ka bërë të ditur se rastet kanë ndodhur në Prishtinë, Suharekë dhe Istog.
Rasti i parë ka ndodhur në Prishtinë, dje ku një grua është ankuar në polici se një person ka ushtruar dhunë psikike ndaj saj, duke i dërguar mesazhe në telefon me përmbajtje ofenduese.
“Pas intervistimit të palëve në konsultim me prokurorin i dyshuari është liruar në procedurë të rregullt”, thuhet në njoftim.
Ndërsa, në Suharekë një person ka mbetur i arrestuar për shkak se kishte ushtruar dhunë fizike ndaj viktimës, e cila për pasojë kishte pranuar edhe tretman mjekësor. Lidhur me këtë rast, me vendim të prokurorit i dyshuari është dërguar në mbajtje për 48 orë.
“Është arrestuar i dyshuari mashkull kosovar për shkak se kishte ushtruar dhunë fizike ndaj viktimës femër kosovare e cila si pasojë ka pranuar tretman mjekësor. Lidhur me rastin personi i dyshuar me vendim të prokurorit është dërguar në mbajtje për 48 orë”.
Rasti i tretë ka ndodhur në Istog, ku pas një mosmarrëveshje një djalë ka filluar të ushtrojë sulm fizik ndaj një vajze. I dyshuari me vendim të prokurorit është dërguar në mbajtje.
“Është arrestuar i dyshuari mashkull kosovar i cili pas një mosmarrëveshjeje verbale e kishte sulmuar fizikisht viktimën femër kosovare. Lidhur me rastin i njëjti me vendim të prokurorit është dërguar në mbajtje”, thuhet në raportin ditor të PK-së./teve1.info/