Vetëm tri raste të dhunës në familje janë raportuar gjatë 24 orëve të fundit në Policinë e Kosovës.
Rastet e dhunës në familje kanë ndodhur në Bardhos, Deçan dhe Dragobil.
Në rastin e parë, një ankuese ka raportuar në Policinë e Kosovës se një i dyshuar ka ushtruar dhunë psikike ndaj saj. Lidhur me këtë ngjarje në raportin 24-orësh është bërë e ditur se rasti është ende në hetime.
“Bardhosh 02.07.2023, 00:50/ Ankuesja femër kosovare ka raportuar se i dyshuari mashkull kosovar kishte ushtruar dhunë psiqike ndaj saj. Rasti nën hetime”, thuhet në njoftimin e Policisë së Kosovës.
Policia thotë se në rastin e dytë një person është arrestuar, pasi që i njëjti ka sulmuar fizikisht viktimën. Viktima si pasojë e plagëve ka pranuar tretman mjekësor, ndërsa me vendim të prokurorit është dërguar në mbajtje.
“Deçan 01.07.2023-19:30. Është arrestuar i dyshuari mashkull kosovar pasi që i njëjti ka sulmuar fizikisht viktimën femër kosovare .Viktima ka pranuar tretman mjekësor. Me vendim të prokurorit i dyshuari dërgohet në mbajtje”, thuhet në raportin 24-orësh.
Edhe në rastin e tretë, një person është arrestuar për dhunë në familje. Si pasojë e një mosmarrëveshje i dyshuari ka sulmuar fizikisht viktimën, ku më pas e njëjta është dërguar për tretman mjekësor. Lidhur me këtë rast, prokurori ka vendosur që i dyshuari të dërgohet në mbajtje.
“Dragobil 01.07.2023-21:30. Është arrestuar i dyshuari mashkull kosovar pasi që i njëjti pas një mosmarrëveshje ka sulmuar fizikisht viktimën femër kosovare. Viktima ka pranuar tretman mjekësor. Me vendim të prokurorit i dyshuari dërgohet në mbajtje”, thotë Policia e Kosovës./teve1.info/
