Tri organizata mjedisore kanë dorëzuar sot padi kundër Ministrisë së Mjedisit, Planifikimit Hapësinor dhe Infrastrukturës që udhëhiqet nga Liburn Aliu, pasi sipas tyre ministri i ka dhënë fshehurazi leje mjedisore kompanisë “Kelkos”, për hidrocentralin “Lumbardhi” në Deçan.
Sipas tyre, “kompania Kelkos, tashmë partnere e ministrit Liburn Aliu, është përgjegjëse për degradimin e Parkut Kombëtare, Bjeshket e Nemuna dhe Deçanit, komunë kjo që kishte pamje që të linin pa frymë ndërsa tani, ashtu siç dëshmohet në foto, ato pamje të ngjallin vetëm keqardhje”.
Tutje, thuhet se përmes kësaj padie ata kërkojnë anulimin e menjëhershëm të lejes mjedisore të lëshuar për kompaninë Kelkos.
“Veçanërisht shqetësues është fakti se lejet janë dhënë përmes një udhëzimi administrativ për të cilën pas ankesës sonë, Zyra e Kryeministrit Albin Kurti kishte dërguar udhëzime ligjore në Ministri duke kërkuar që të plotësojë atë Udhezim Administrativ për të përfshirë pjesëmarrjen publike. Ministri Aliu ka injoruar edhe kërkese ligjore te Kryeministrit dhe ka favorizuar kundërligjshëm kompaninë Kelkos, duke shkuar edhe një hap me tutje se ministrat e qeverive të kaluara. Përmes kësaj padie ne kërkojmë anulimin e menjëhershëm të lejes mjedisore të lëshuar për kompaninë Kelkos, gjë që do ta shpëtonte shkatërrimin e ambientit në Deçan”, thuhet në reagim./teve1.info
