Portieri Thomas Strakosha, mesfushori Nedim Bajrami dhe sulmuesi Mirlind Daku, kanë munguar në stërvitjen e parë të Shqipërisë për ndeshjet e rëndësishme kualifikuese për Kupën e Botës 2026 kundër Andorrës dhe Anglisë.
“Në seancën hapëse stërvitore u stërvitën pjesa më e madhe e lojtarëve që kanë mbërritur, ndërkohë që sonte pritet që grupi të plotësohet me ardhjen e Thomas Strakoshës, Nedim Bajramit dhe Mirlind Daku”, shkruan Federata Shqiptare e Futbollit të hënën.
FSHF-ja po ashtu ka njoftuar se kapiteni Berat Gjimshiti dhe Arbër Hoxha kanë zhvilluar në palestër stërvitje për shkak të paraqitjes me klubet e tyre përkatëse të dielën.
Shqipëria të enjten e luan ndeshjen e parafundit kundër Andorrës në udhëtim, kurse më 16 nëntor në Tiranë e pret Anglinë.
Shqipëria grumbullimin e ka nisur në Barcelonë.
